ഞണ്ടും താറാവും കരിമീന്‍ മപ്പാസും കൊഞ്ചും; എങ്കിൽ ഈ ഷാപ്പിലേക്ക് പോന്നോളൂ

നല്ല എരിവുള്ള തലക്കറി, കായലില്‍ നിന്ന് ഫ്രെഷായി പിടിച്ചെടുത്ത നാടൻ ഞണ്ട്, പിന്നെ നല്ല അടിപൊളി കരിമീൻ മപ്പാസ്... ഇതൊക്കെ കൂട്ടി അടിപൊളി ഒരു ഊണ്. കേൾക്കുമ്പോൾ തന്നെ വായിൽ കപ്പലോടുന്നുണ്ടല്ലേ? ആര്‍ക്കാണ് ഇത് കേള്‍ക്കുമ്പോള്‍ കൊതി വരാത്തത്? എങ്കില്‍ പിന്നെ ഒന്നും ആലോചിക്കാനില്ല. ഈ വീക്കെന്‍ഡ് നേരെ മണ്‍റോ ദ്വീപിലേക്ക് തന്നെ വച്ചു പിടിക്കാം!  

അഷ്ടമുടിക്കായലിന്‍റെ ഹൃദയമാണ് മൺറോ ദ്വീപ്. ശാന്തമായ കായൽ പരപ്പും, ഇടതൂർന്ന തെങ്ങിൻ തോപ്പുകളും, ഇടുങ്ങിയ ജലപാതകളും, കണ്ടൽക്കാടുകളുമെല്ലാം ചേരുന്ന ഈ തുരുത്ത്, കായൽ യാത്രകളും, നാടൻ ഭക്ഷണവും, ഗ്രാമീണ ജീവിതരീതികളുമെല്ലാം ഇഷ്ടമുള്ളവര്‍ക്ക് പ്രിയപ്പെട്ട ഇടങ്ങളില്‍ ഒന്നാണ്. 

മൺറോ ദ്വീപിലെ, എസ് വളവിൽ സ്ഥിതി ചെയ്യുന്ന ഒരു നാടൻ ടോഡി ഷോപ്പ്,  ഇന്‍സ്റ്റഗ്രാമിലും മറ്റും ചെത്ത് പിള്ളേര്‍ വൈറല്‍ ആക്കിയ രുചിയിടങ്ങളില്‍ ഒന്നാണ്. ഇവിടുത്തെ രഹസ്യം മറ്റൊന്നുമല്ല, കായലിൽ നിന്ന് നേരിട്ട് പിടിച്ചെത്തുന്ന ശുദ്ധമായ മത്സ്യ വിഭവങ്ങളുടെ രുചിയുടെ മാന്ത്രികത തന്നെ!

കരിമീൻ പൊള്ളിച്ചത്, മൊരിഞ്ഞ കേര ഫ്രൈ, മസാല പുരട്ടി റോസ്റ്റ് ചെയ്ത ഞണ്ട്... ഇവിടുത്തെ ഓരോ വിഭവവും നാവിൽ രുചിയുടെ ഒരു പുതിയ ലോകം തുറന്നു തരും. മത്സ്യ വിഭവങ്ങൾ മാത്രമല്ല, ഇറച്ചി പ്രേമികൾക്കായി നാടൻ മസാല ചേര്‍ത്ത് ഉണ്ടാക്കിയ ബീഫ് റോസ്റ്റ്, തേങ്ങാപ്പാൽ ഒഴിച്ചുള്ള രുചികരമായ താറാവ് മപ്പാസ്, കൊഞ്ച് ഫ്രൈ തുടങ്ങിയ വിഭവങ്ങളും ഇവിടെ ആസ്വദിക്കാം. ഓര്‍ഡര്‍ ചെയ്യുന്നതനുസരിച്ച് അപ്പപ്പോള്‍ ഉണ്ടാക്കി കൊടുക്കുന്നതാണ് പതിവ്.

ഫ്രെഷായി പിടിച്ച് അപ്പപ്പോൾ തയാറാക്കുന്നത് കൊണ്ട് തന്നെ, ഓരോ വിഭവത്തിനും അതിന്റേതായ തനത് രുചിയും മണവും ഉണ്ടാകും. കൂടാതെ, വെള്ളയപ്പം, അപ്പം പോലുള്ള നാടൻ പലഹാരങ്ങളും ലഭ്യമാണ്. ഈ രുചികൾക്ക് കൂട്ടായി, കണ്ടൽക്കാടുകളുടെ പശ്ചാത്തലവും, കായലില്‍ നിന്നൊഴുകി വരുന്ന ഇളംതെന്നലും ചേരുമ്പോൾ, ഭക്ഷണം കഴിക്കുന്നത് വെറുമൊരു ചടങ്ങല്ല, അതൊരു മനോഹരമായ അനുഭവമായി മാറും.

ഭക്ഷണം കഴിച്ചു കഴിഞ്ഞാൽ, മൺറോ ദ്വീപിന്‍റെ സൗന്ദര്യം ആസ്വദിക്കാൻ ബോട്ടിംഗിനു പോകാനുള്ള സൗകര്യവും ഈ ഷാപ്പിനടുത്തുണ്ട്. 

രാവിലെ 8:00 മുതൽ രാത്രി 8:30 - 9:00 വരെയാണ് കടയുടെ പ്രവർത്തന സമയം. അതുകൊണ്ട് തന്നെ, പ്രഭാത ഭക്ഷണം മുതൽ അത്താഴം വരെ രുചികരമായ നാടൻ വിഭവങ്ങൾ ഇവിടെ നിന്ന് ആസ്വദിക്കാനാകും.

ഇവരുടെ കോൺടാക്റ്റ് നമ്പർ: 9446079966 

ഷാപ്പ് രുചിയില്‍ സ്പൈസി തലക്കറി വീട്ടില്‍ ഉണ്ടാക്കാം

ചേരുവകൾ

മീൻ തല (കേര, അയക്കൂറ, നെയ്മീൻ, ചൂര, വാള - ഏത് വേണമെങ്കിലും) - 1 വലുത്, ഇടത്തരം കഷണങ്ങളാക്കിയത്

ചെറിയ ഉള്ളി - 15-20 എണ്ണം, ചതച്ചത്

ഇഞ്ചി - 2 ഇഞ്ച് നീളത്തിൽ, ചതച്ചത്

വെളുത്തുള്ളി - 10-12 അല്ലി, ചതച്ചത്

പച്ചമുളക് - 3-4 എണ്ണം, നടുക്കെ കീറിയത്

കുടംപുളി - 3-4 എണ്ണം, ചെറിയ കഷ്ണങ്ങളാക്കിയത് (ചെറിയ ചൂടുവെള്ളത്തിൽ 10 മിനിറ്റ് കുതിർത്തത്)

മുളകുപൊടി - 2-3 ടീസ്പൂൺ (നിങ്ങളുടെ എരിവിനനുസരിച്ച്)

മല്ലിപ്പൊടി - 2 ടീസ്പൂൺ

മഞ്ഞൾപ്പൊടി - 1/2 ടീസ്പൂൺ

ഗരം മസാല - 1/2 ടീസ്പൂൺ

കുരുമുളകുപൊടി - 1/4 ടീസ്പൂൺ

കറിവേപ്പില - 2-3 തണ്ട്

വെളിച്ചെണ്ണ - 3-4 ടേബിൾസ്പൂൺ

ഉപ്പ് - ആവശ്യത്തിന്

വെള്ളം - ആവശ്യത്തിന്

തയാറാക്കുന്ന വിധം

- മീൻ തല വൃത്തിയാക്കുക: മീൻ തല നന്നായി കഴുകി ചെകിളയും മറ്റ് വേണ്ടാത്ത ഭാഗങ്ങളും നീക്കം ചെയ്യുക. വലിയ തലയാണെങ്കിൽ, ഇടത്തരം കഷണങ്ങളായി മുറിക്കുക.

- മസാല തയ്യാറാക്കുക: ഒരു മൺചട്ടിയിൽ വെളിച്ചെണ്ണ ചൂടാക്കുക. എണ്ണ ചൂടായ ശേഷം കറിവേപ്പില ഇടുക.

ചതച്ച ചെറിയ ഉള്ളി ചേർത്ത് നന്നായി വഴറ്റുക. ഇത് ഇളം ബ്രൗൺ നിറമാകുമ്പോൾ ചതച്ച ഇഞ്ചി, വെളുത്തുള്ളി, കീറിയ പച്ചമുളക് എന്നിവ ചേർത്ത് പച്ചമണം മാറുന്നത് വരെ വഴറ്റുക.

ഇതിലേക്ക് മഞ്ഞൾപ്പൊടി, മുളകുപൊടി, മല്ലിപ്പൊടി എന്നിവ ചേർത്ത് ചെറുതീയിൽ ഒരു മിനിറ്റ് നേരം ഇളക്കുക. 

- പൊടികളുടെ പച്ചമണം മാറുന്നത് വരെ ശ്രദ്ധയോടെ ഇളക്കുക.

കുതിർത്ത കുടംപുളിയും അതിന്റെ വെള്ളവും ഇതിലേക്ക് ചേർത്ത് ആവശ്യത്തിന് ഉപ്പും ചേർത്ത് തിളപ്പിക്കുക.

തിളച്ച ശേഷം മീൻ തല കഷ്ണങ്ങൾ ചേർത്ത് നന്നായി ഇളക്കി യോജിപ്പിക്കുക.

- ചെറിയ തീയിൽ അടച്ചു വെച്ച് മീൻ നന്നായി വേവുന്നതുവരെ പാകം ചെയ്യുക. ഏകദേശം 15-20 മിനിറ്റ് എടുക്കും. ഇടയ്ക്കിടെ ഇളക്കി കൊടുക്കുക.

- കറി കുറുകി വരുമ്പോൾ ഗരം മസാലയും കുരുമുളകുപൊടിയും ചേർത്ത് ഇളക്കുക.

കറി നന്നായി വറ്റിയ ശേഷം കുറച്ച് പച്ച വെളിച്ചെണ്ണയും കറിവേപ്പിലയും തൂവി വിളമ്പാം.