ADVERTISEMENT

എല്ലാ വീട്ടിലെയും അടുക്കളയില്‍, പാചകം ചെയ്യുന്ന ആളുടെ അത്ര തന്നെ തിരക്കുള്ള 'ഒരാളു'ണ്ട് - മിക്സി എന്ന് ഓമനപ്പേരിട്ട് വിളിക്കുന്ന മിക്സര്‍ ഗ്രൈന്‍ഡര്‍! ചമ്മന്തി അരയ്ക്കുന്നതുമുതൽ ഇഞ്ചി, വെളുത്തുള്ളി പേസ്റ്റാക്കാനും, മസാലകൾ പൊടിക്കാനും, ദോശമാവ് തയ്യാറാക്കാനുമെല്ലാം ആശാന്‍ വേണം. എന്നാലോ, ഇതൊക്കെ കഴിഞ്ഞ് ജാര്‍ നന്നായി കഴുകി വച്ചാലും ഒരു കാര്യവുമില്ല. പിന്നീട് ഉപയോഗിക്കാന്‍ വേണ്ടി എടുക്കുന്ന സമയത്ത് ഇതിന് ഒരു തരം ദുര്‍ഗന്ധം ഉണ്ടാകും.

ഈ മണം മാറാതെ നിൽക്കുന്നത് പലപ്പോഴും നമ്മളെ അലോസരപ്പെടുത്താറുണ്ട്. ഭക്ഷണങ്ങളുടെ അവശിഷ്ടങ്ങളാണ് ഈ ദുർഗന്ധത്തിന് കാരണമെന്ന് പലരും തെറ്റിദ്ധരിക്കാറുണ്ട്.  എന്നാല്‍ അതല്ല, ശരിയായ രീതിയിൽ ഉണക്കാത്തതാണ് ഇതിനുള്ള പ്രധാന കാരണം.

അരയ്ക്കാൻ ജാർ ഉപയോഗിക്കുമ്പോൾ, വെള്ളം ബ്ലേഡുകളുടെ അടിയിലും ലിഡിന്റെ വിടവുകളിലും റബ്ബർ റിങ്ങിലുമെല്ലാം പറ്റിപ്പിടിക്കാൻ സാധ്യതയുണ്ട്. ഈ ഈർപ്പം ശരിയായി നീക്കം ചെയ്തില്ലെങ്കിൽ, ബാക്ടീരിയകൾക്കും പൂപ്പലിനും വളരാൻ പറ്റിയ സാഹചര്യമൊരുങ്ങും.

ഇതുകൂടാതെ, ഇത് ബ്ലേഡുകൾ തുരുമ്പെടുക്കുന്നതിനും കാരണമാകും. ഈ തുരുമ്പ് ദുർഗന്ധമുണ്ടാക്കുമെന്നുമാത്രമല്ല, അടുത്തതായി അരയ്ക്കുന്ന ഭക്ഷണത്തിന്റെ രുചി തന്നെ മാറ്റിക്കളഞ്ഞേക്കാം.

വെറുതെ കഴുകി തുടച്ചാൽ മതിയോ?

മിക്സി ജാർ അപ്പപ്പോള്‍ തന്നെ കഴുകി തുടച്ച് വയ്ക്കുന്നത് നല്ലതാണ്. പക്ഷേ, അത് മാത്രം പോര. കാരണം, മിക്സി തുടയ്ക്കാന്‍ ഉപയോഗിക്കുന്ന ടവലുകളിൽ ബാക്ടീരിയകൾ ഉണ്ടാകാൻ സാധ്യതയുണ്ട്. ഇവ കൃത്യമായി വൃത്തിയാക്കിയില്ലെങ്കിൽ ജാറിലേക്ക് പകരാം. മാത്രമല്ല, ബ്ലേഡിന്റെ അടിഭാഗത്തും ലിഡിന്റെ വിടവുകളിലും തുണികൊണ്ട് മാത്രം വൃത്തിയാക്കാൻ പ്രയാസമാണ്.

ജാർ ഉണങ്ങിയതായി തോന്നിയാലും, ചില കോണുകളിൽ ഈർപ്പം തങ്ങിനിൽക്കാൻ സാധ്യതയുണ്ട്. ഈ അവശേഷിക്കുന്ന ഈർപ്പമാണ് പിന്നീട് പ്രശ്നങ്ങൾക്ക് കാരണമാകുന്നത്.

ഈ പ്രശ്നത്തിന് പെട്ടെന്ന്, എളുപ്പത്തിൽ ഒരു പരിഹാരം കിട്ടാന്‍  ജാർ നന്നായി ഉണങ്ങാൻ അനുവദിക്കുക.

മിക്സി ജാറും അതിന്റെ ലിഡും സൂക്ഷിക്കുന്നതിന് മുമ്പ് പൂർണ്ണമായും വായുവിൽ ഉണങ്ങാൻ എപ്പോഴും ശ്രദ്ധിക്കുക. ഇതുവഴി, ദുർഗന്ധവും  ഒട്ടിപ്പിടിക്കുന്ന കറകളും എണ്ണമയമുള്ള അഴുക്കും ഇല്ലാതാക്കാം. .

മിക്സി ജാറുകൾ പൂർണമായും ഉണക്കാൻ 3 വഴികൾ

1.  സൂര്യപ്രകാശത്തിൽ ഉണക്കുക: ജാറും ലിഡും തുറന്നുവെച്ച് 10-15 മിനിറ്റ് നേരം നേരിട്ടുള്ള സൂര്യപ്രകാശത്തിൽ വെക്കുക. സൂര്യപ്രകാശം നന്നായി ഉണക്കാൻ സഹായിക്കുമെന്നുമാത്രമല്ല, ഇതിന് സ്വാഭാവികമായ ആൻറി ബാക്ടീരിയൽ ഗുണങ്ങളുമുണ്ട്.

2. ടിഷ്യുവും ഫാനും ഉപയോഗിച്ച്: ഒരു വൃത്തിയുള്ള ടിഷ്യു പേപ്പറിലോ ഉണങ്ങിയ അടുക്കള ടവ്വലിലോ ജാർ കമഴ്ത്തി ഫാനിന്റെ താഴെ വെക്കുക. ഫാനിന്റെ കാറ്റ് ഉണങ്ങുന്നത് വേഗത്തിലാക്കാൻ സഹായിക്കും, ബ്ലേഡുകൾക്ക് സമീപമുള്ള ഈർപ്പം ടിഷ്യു പേപ്പർ വലിച്ചെടുക്കും.

3. സ്പിൻ ഡ്രൈ ട്രിക്ക്: ജാർ കഴുകി ലിഡ് അടച്ച ശേഷം, ഒഴിഞ്ഞ മിക്സി അഞ്ച് സെക്കൻഡ് നേരം പ്രവർത്തിപ്പിക്കുക. ഈ വേഗത്തിലുള്ള കറക്കം ഒളിഞ്ഞിരിക്കുന്ന വെള്ളത്തുള്ളികളെ പുറത്തേക്ക് തെറിപ്പിക്കും. അതിനുശേഷം ഒരു ടിഷ്യു കൊണ്ട് തുടച്ച്, ജാർ ലിഡ് തുറന്നു വെക്കുക.

ഡീപ് ക്ലീൻ ചെയ്യാം

ആഴ്ചയിലൊരിക്കൽ ഡീപ് ക്ലീൻ ചെയ്യുന്നത് മിക്സിയുടെ ജാറുകൾ പുതിയതും ശുചിത്വമുള്ളതുമായി നിലനിർത്താൻ സഹായിക്കും. അതിനുള്ള ഒരു എളുപ്പ വിദ്യ ഇതാ:

* 1 ടീസ്പൂൺ  വെള്ള വിനാഗിരി അര ടീസ്പൂൺ ബേക്കിംഗ് സോഡയുമായി കലർത്തുക.

* ഈ മിശ്രിതം ജാറിനുള്ളിൽ പുരട്ടി 10-15 മിനിറ്റ് വെക്കുക.

* ചെറുതായി ഉരച്ച്, ചൂടുവെള്ളത്തിൽ കഴുകി നന്നായി ഉണക്കുക.

ഈ രീതി കടുത്ത ദുർഗന്ധം ഇല്ലാതാക്കാനും അവശേഷിക്കുന്ന കറകള്‍ നീക്കം ചെയ്യാനും വളരെ ഫലപ്രദമാണ്.

English Summary:

Mixer grinder cleaning is essential for maintaining a hygienic kitchen. Cleaning properly and drying is very important to avoid bad odor.

ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
തൽസമയ വാർത്തകൾക്ക് മലയാള മനോരമ മൊബൈൽ ആപ് ഡൗൺലോഡ് ചെയ്യൂ
അവശ്യസേവനങ്ങൾ കണ്ടെത്താനും ഹോം ഡെലിവറി  ലഭിക്കാനും സന്ദർശിക്കു www.quickerala.com