ഷാപ്പിലെ മീൻകറി വീട്ടിൽ വയ്ക്കുമ്പോൾ ഇക്കാര്യം അറിഞ്ഞിരിക്കാം

നാവിൽ വെള്ളമൂറുന്നൊരു മീൻകറിക്കൂട്ട്!!! കുടുംപുളിയും വെളുത്തുളളിയും ഇഞ്ചിയും രുചിക്കുന്ന ഈ മീൻകറി  എളുപ്പത്തിൽ തയാറാക്കാം. ഷാപ്പില്‍ കിട്ടുന്ന മീൻകറി വയ്ക്കുമ്പോൾ ചില കാര്യങ്ങൾ ശ്രദ്ധിക്കണം. എന്തൊക്കെയെന്ന് അറിയാം.

മൺചട്ടി ഉപയോഗിക്കുക: തലക്കറി മൺചട്ടിയിൽ വയ്ക്കുമ്പോൾ ഒരു പ്രത്യേക രുചി ലഭിക്കും.

ചെറിയ ഉള്ളി: ചെറിയ ഉള്ളി ധാരാളമായി ഉപയോഗിക്കുന്നത് കറിക്ക്  രുചിയും കൊഴുപ്പും നൽകും.

കുടംപുളി: കുടംപുളിയുടെ ഉപയോഗം ഷാപ്പ് തലക്കറിയുടെ പ്രധാന രുചിയാണ്. ഇതിന് പകരം വാളൻപുളി ഉപയോഗിക്കാതിരിക്കാൻ ശ്രമിക്കുക.

എരിവ്: ഷാപ്പ് തലക്കറി സാധാരണയായി നല്ല എരിവുള്ളതായിരിക്കും. നിങ്ങളുടെ ഇഷ്ടത്തിനനുസരിച്ച് മുളകുപൊടിയുടെ അളവ് കൂട്ടുകയോ കുറയ്ക്കുകയോ ചെയ്യാം.

വറ്റിച്ചെടുക്കുക: ഷാപ്പ് സ്റ്റൈൽ തലക്കറി അധികം ചാറില്ലാതെ വറ്റിച്ചെടുത്ത രൂപത്തിലാണ് കൂടുതൽ രുചികരം.

സമയം: കുറഞ്ഞ തീയിൽ കൂടുതൽ സമയം വേവിക്കുന്നത് മസാല നന്നായി പിടിക്കാനും രുചി കൂടാനും സഹായിക്കും.

ഈ രീതിയിൽ തയ്യാറാക്കിയാൽ നിങ്ങൾക്ക് ഷാപ്പ് രുചിയിലുള്ള സ്പൈസി തലക്കറി വീട്ടിൽ തന്നെ ആസ്വദിക്കാൻ സാധിക്കും. ചൂട് ചോറിനൊപ്പം ഈ കറി കഴിക്കാൻ വളരെ രുചികരമാണ്!

ഷാപ്പിലെ മീൻകറി

രുചിയൂറും മീൻകറി വയ്ക്കാം

ആവശ്യമായ സാധനങ്ങൾ 

മീൻ - അര കിലോ

ഇഞ്ചി - ഒരു കഷ്ണം ചെറുതായി അരിഞ്ഞത്

വെളുത്തുള്ളി - 5 അല്ലി

ചെറിയുള്ളി

കുടം പുളി - 2 വലിയ കഷണം

പച്ചമുളക് - 3 എണ്ണം

മുളക് പൊടി - 2 ടേബിൾ സ്പൂൺ

മഞ്ഞൾ പൊടി - അര ടീസ്പൂൺ

ഉലുവ

കടുക്

ഉപ്പ്

വെളിച്ചെണ്ണ

ഉണക്ക മുളക് – 2

തയാറാക്കുന്ന വിധം

∙ ഒരു മൺചട്ടിയിൽ വെളിച്ചെണ്ണ ഒഴിച്ചു ചൂടായതിനു ശേഷം, കടുകും, ഒരു നുള്ളു ഉലുവയും, 2 ഉണക്ക മുളകും, കറിവേപ്പിലയും ഇടുക.

∙ അതിനു ശേഷം ചെറുതായി അരിഞ്ഞു വെച്ചിരിക്കുന്ന ഇഞ്ചിയും വെളുത്തുള്ളിയും ചെറിയുള്ളിയും പച്ചമുളകും ഇട്ടു വഴറ്റുക.

∙ ഇതിലേക്ക് 2 ടേബിൾ സ്പൂൺ മുളക് പൊടിയും അര ടീസ്പൂൺ മഞ്ഞൾപൊടിയും ചേർത്ത് വഴറ്റുക.

∙ വെള്ളത്തിൽ കുതിർത്തു വെച്ച കുടം പുളി ചേർക്കുക, അതിനു ശേഷം തിളപ്പിച്ച വെള്ളവും ഉപ്പും ചേർത്ത ഒന്ന് ചൂടാക്കുക. ഈ കൂട്ടിലേക്ക് മീൻ ചേർത്തു വേവിക്കുക. അടപ്പ് ഇടരുത്, വെള്ളം വറ്റി നല്ല കുറുകി വരണം . അതിനു ശേഷം തീ ഓഫ് ചയ്തു ചൂടാറിയതിനു ശേഷം ഉപയോഗിക്കുക.