കാൽ നൂറ്റാണ്ടിലെറെയായി വെള്ളക്കെട്ട്, വഴിമുട്ടി; പ്രതിഷേധിച്ച് നാട്ടുകാർ

ചെറിയനാട് ∙ കാൽ നൂറ്റാണ്ടിലെറെയായി വെള്ളക്കെട്ടു താണ്ടി സഞ്ചരിക്കുകയാണ് പാറമേൽപടി ആലിൻചുവട് – ഗുരുമന്ദിരം ബണ്ട് റോഡരികിലെ താമസക്കാ‍ർ. പരിഹാരം കാണാത്തതിനെതിരെ കുട്ടികളടക്കം വെള്ളത്തിലിറങ്ങി പ്രതിഷേധിച്ചു. ചെറിയനാട് പഞ്ചായത്തിലെ ഒന്നാം വാർഡിൽപെട്ട ഇവിടെ ചെറിയ മഴ പെയ്താൽ റോഡിൽ വെള്ളം കയറും. പിന്നെ വാഹനങ്ങൾക്കും കാൽനടക്കാർക്കും സഞ്ചരിക്കാൻ കഴിയാത്ത അവസ്ഥയാണ്. മുപ്പതിലേറെ വീട്ടുകാരാണ് ദിനംപ്രതി ഈ പാത ഉപയോഗിക്കുന്നത്.

പഞ്ചായത്ത്  അധികൃതരോട് പലതവണ പരാതിപ്പെട്ടിട്ടും ഫലമുണ്ടായിട്ടില്ല. ഫണ്ട് ഇല്ലെന്ന സ്ഥിരം പല്ലവിയാണ് മറുപടി. ഈ വെള്ളപ്പൊക്കത്തിലും ഇവിടത്തുകാർക്കു പുറത്തിറങ്ങാൻ പോലുമായിട്ടില്ല. ഇന്നലെ വെള്ളമിറങ്ങിയതോടെയാണ് വീട്ടുകാർ സംഘടിച്ചു പ്രതിഷേധിച്ചത്. അര കിലോമീറ്റർ വരുന്ന ഈ പാത ഭാഗികമായി കഴിഞ്ഞ പഞ്ചായത്ത് സമിതിയുടെ നേതൃത്വത്തിൽ ഗതാഗതയോഗ്യമാക്കിയതാണ്. ശേഷിക്കുന്ന ഭാഗം വെള്ളപ്പൊക്ക പദ്ധതിയിൽ പെടുത്തിയിട്ടുണ്ടെന്ന് പഞ്ചായത്തംഗം സുനി രാജൻ പറഞ്ഞു.