മാർജിൻഫ്രീ മാർക്കറ്റിൽ അഗ്നിബാധ: ലക്ഷങ്ങളുടെ നഷ്ടം

എടത്വ∙ മാർജിൻ ഫ്രീ മാർക്കറ്റിൽ തീപിടിത്തം. തലവടി വില്ലേജ് ഓഫിസിനു സമീപം യൂണിവേഴ്സൽ മാർജിൻ ഫ്രീ മാർക്കറ്റ് ഷോറൂമിലാണ് ഇന്നലെ പുലർച്ചെ 5.30 ന് തീ പിടിത്തം ഉണ്ടായത്. ലക്ഷങ്ങളുടെ നഷ്ടം സംഭവിച്ചതായി ഉടമ മുണ്ടുചിറയിൽ അനീഷ് കുമാർ പറഞ്ഞു.  ഷോർട്സർക്യൂട്ട് ആണ് കാരണമെന്നു കരുതുന്നു. പ്രഭാത സവാരിക്ക് ഇറങ്ങിയവർ കടയിൽ നിന്നും പുക ഉയരുന്നതു കണ്ട് ഉടമയെ വിവരം അറിയിക്കുകയായിരുന്നു. ഉടമ എത്തി നാട്ടുകാരുടെ സഹായത്തോടെ തീ അണച്ചു. സ്റ്റേഷനറി സാധനങ്ങളാണ് നഷ്ടമായതിൽ കൂടുതലും. പുക നിറഞ്ഞതിനാൽ മറ്റു സാധനങ്ങൾ ഉപയോഗ ശൂന്യമായി.