അർത്തുങ്കലിൽ കുതിര പ്രസവിച്ചു

ചേർത്തല ∙ അർത്തുങ്കൽ ചേന്നവേലിയിൽ കുതിര പ്രസവിച്ചു. ആറാട്ടുകുളം വീട്ടിൽ അനീഷ് ആറാട് കുളത്തിന്റെ ‘അമ്മു’ എന്ന കുതിരയാണ് ആൺകുതിരയ്ക്കു ജന്മം നൽകിയത്. കർണാടകയിൽ നിന്ന് കുതിരയെ വാങ്ങി വിൽക്കുന്ന സുഹൃത്തിൽ നിന്നാണ് 5 മാസങ്ങൾക്കു മുൻപ് ഗർഭിണിയായ കുതിരയെ വാങ്ങിയതെന്ന് അനീഷ് പറഞ്ഞു. ഇന്നലെ രാവിലെ മുതൽ പ്രസവ ലക്ഷണങ്ങൾ കാട്ടിത്തുടങ്ങി.

അനീഷിന്റെ ബന്ധുവായ വെറ്ററിനറി ഡോക്ടർ സിമി മാർട്ടിന്റെ നിർദേശാനുസരണം ശുശ്രൂഷ നൽകി. പത്തോടെ പ്രസവം നടന്നു.കണിച്ചുകുളങ്ങര വെറ്ററിനറി ആശുപത്രിയിൽ നിന്നു വെറ്ററിനറി സർജൻ ഡോ ജോർജ് വർഗീസ് എത്തി കൂടുതൽ നിർദേശങ്ങളും പരിചരണവും നൽകി. ഇത് കൂടാതെ ഇംഗ്ലിഷ് ബ്രീഡ് കുതിരയേയും അനീഷ് വളർത്തുന്നുണ്ട്. ഭാര്യ ഡാനിയയും മക്കളായ സിയന്ന, ലിയ, ക്രിസ്റ്റി എന്നിവരും കുതിരകളെ പരിചരിക്കുന്നതിൽ അനീഷിനൊപ്പമുണ്ട്.