ആധാർ– വോട്ടർപട്ടിക ബന്ധിപ്പിക്കൽ: ആലപ്പുഴ ജില്ല ഒന്നാമത്

ആലപ്പുഴ∙ ആധാർ– വോട്ടർപട്ടികയുമായി ബന്ധിപ്പിക്കുന്നതിൽ ആലപ്പുഴ ജില്ല ഒന്നാമത്. ജില്ലയിൽ 2,54,123 പേരാണ് ഇതുവരെ ആധാർ വോട്ടർപട്ടികയുമായി ബന്ധിപ്പിച്ചത്. കൊല്ലം ജില്ലയാണ് രണ്ടാമത്. സംസ്ഥാനത്ത് ആദ്യമായി 100 ശതമാനം നേട്ടം കൈവരിച്ചത് ഹരിപ്പാട് മണ്ഡലത്തിലെ 83-ാം നമ്പർ ബൂത്താണ്.

വോട്ടർമാരുടെ വിവരങ്ങൾ ഉറപ്പാക്കുക, വോട്ടർ പട്ടികയിലെ ഇരട്ടിപ്പ് ഒഴിവാക്കുക തുടങ്ങിയവ ലക്ഷ്യമിടുന്ന ബന്ധിപ്പിക്കൽ നടപടികൾ ഒക്ടോബർ 25ന് മുൻപു പൂർത്തിയാക്കാനാണു തീരുമാനം. തിരഞ്ഞെടുപ്പ് കമ്മിഷന്റെ www.nvsp.in എന്ന വെബ്‌സൈറ്റ് വഴിയോ വോട്ടർ ഹെൽപ്​ലൈൻ ആപ് വഴിയോ ഫോറം 6 ബി പൂരിപ്പിച്ച് ലിങ്കിങ് നടത്താം. ഇതിനായി കലക്ടറേറ്റുകളിലും താലൂക്ക് ഓഫിസുകളിലും മറ്റ് സർക്കാർ ഓഫിസുകളിലും ഹെൽപ് ഡസ്‌ക് പ്രവർത്തിക്കുന്നുണ്ട്.