ആലപ്പുഴ ജില്ലയിൽ ഇന്ന് (02-10-2022); അറിയാൻ, ഓർക്കാൻ
Mail This Article
എസി റോഡിൽ ഗതാഗത നിരോധനം
കുട്ടനാട് ∙ ആലപ്പുഴ–ചങ്ങനാശേരി റോഡ് നവീകരണത്തോടനുബന്ധിച്ചു പൂപ്പള്ളിയിൽ നിർമിക്കുന്ന കോസ്വേയുടെ ഗർഡർ കോൺക്രീറ്റിങ് നടക്കുന്നതിനാൽ നാളെ രാത്രി 9.30 മുതൽ 1.30 വരെ ഗതാഗതം പൂർണമായി നിരോധിച്ചു. എല്ലാ വാഹനങ്ങളും മങ്കൊമ്പ്–ചമ്പക്കുളം–എസ്എൻ കവല വഴിയോ മങ്കൊമ്പ്–ചമ്പക്കുളം–പൂപ്പള്ളി വഴിയോ തിരിഞ്ഞു പോകണം.
സൗജന്യ പരിശീലനം
ആലപ്പുഴ∙ കലവൂർ, ആര്യാട് ബ്ലോക്ക് പഞ്ചായത്ത് ഓഫിസിൽ പ്രവർത്തിക്കുന്ന എസ്ബിഐയുടെ ഗ്രാമീണ സ്വയം തൊഴിൽ പരിശീലന കേന്ദ്രത്തിൽ ഫാഷൻ ഡിസൈനിങ്ങിൽ ഒരു മാസത്തെ സൗജന്യ പരിശീലനം നൽകുന്നു. ഒക്ടോബർ മൂന്നിന് രാവിലെ 10.30ന് പരിശീലന കേന്ദ്രത്തിൽ അഭിമുഖം നടത്തും. 0477-2292428, 83300 11815.
താൽക്കാലിക നിയമനം
ചെങ്ങന്നൂർ ∙ ഐഎച്ച്ആർഡി എൻജിനീയറിങ് കോളജിൽ 2022-23 അധ്യയന വർഷത്തിൽ ഒഴിവു വന്നിട്ടുള്ള അസിസ്റ്റന്റ് പ്രഫസർ (ഇംഗ്ലിഷ്) തസ്തികയിലേക്ക് താൽക്കാലിക നിയമനം നടത്തുന്നു. 13നു രാവിലെ 10.30 നു ടെസ്റ്റ് / ഇന്റർവ്യൂ നടത്തി റാങ്ക് ലിസ്റ്റ് തയാറാക്കുന്നതാണ്. വെബ്സൈറ്റ്: www.ceconline.edu ഫോൺ : 0479 – 2454125, 0479 2455125.
ലഹരി വിമുക്ത ക്യാംപെയ്ൻ: കൂട്ടയോട്ടം ഇന്ന്
ആലപ്പുഴ∙ യുവജനക്ഷേമ ബോർഡിന്റെ നേതൃത്വത്തിൽ ഇന്ന് രാവിലെ ഒൻപതിന് ലഹരി വിമുക്ത ക്യാംപെയ്നിനോട് അനുബന്ധിച്ച് കൂട്ടയോട്ടം സംഘടിപ്പിക്കും. ഇഎംഎസ് സ്റ്റേഡിയത്തിൽ നിന്ന് നഗരചത്വരം വരെയാണ് കൂട്ടയോട്ടം. എച്ച്.സലാം എംഎൽഎ പരിപാടി ഉദ്ഘാടനം ചെയ്യും.
എൻട്രികൾ ക്ഷണിച്ചു
ആലപ്പുഴ∙ ലഹരി വിരുദ്ധ വാരാചരണത്തിന്റെ ഭാഗമായി വിഡിയോ മത്സരത്തിന് എൻട്രികൾ ക്ഷണിച്ചു. പശ്ചാത്തല സംഗീതം ഉൾപ്പെടെയുള്ള, പരമാവധി രണ്ട് മിനിറ്റിൽ കവിയാത്ത എച്ച്ഡി ക്വാളിറ്റി വിഡിയോകളാണ് സമർപ്പിക്കേണ്ടത്. വിഡിയോകൾ prdvideocontest@gmail.com എന്ന ഇ-മെയിലിലേക്ക് 10 വരെ അയയ്ക്കാം. 0477 2251349