ആലപ്പുഴ ജില്ലയിൽ ഇന്ന് (01-02-2023); അറിയാൻ, ഓർക്കാൻ

എസി റോഡ്:ഗതാഗതം നിരോധിച്ചു: കുട്ടനാട് ∙ ആലപ്പുഴ- ചങ്ങനാശേരി (എസി റോഡ്) റോഡ് നവീകരണത്തിന്റെ ഭാഗമായി പാറക്കൽ ചെറിയ പാലത്തിന്റെ ഗർഡർ സ്ഥാപിക്കുന്ന ജോലികൾ നടക്കുന്നതിനാൽ ഇന്നു രാത്രി 10 മുതൽ നാളെ രാവിലെ 6 വരെ ഇതുവഴിയുള്ള ഗതാഗതം നിരോധിച്ചു. വാഹനങ്ങൾ അമ്പലപ്പുഴ- തിരുവല്ല റോഡിലൂടെ തിരിഞ്ഞു പോകണം.

തീയതി നീട്ടി: ആലപ്പുഴ∙ ജവാഹർ നവോദയ വിദ്യാലയത്തിൽ ആറാം ക്ലാസ് പ്രവേശനത്തിന് ഓൺലൈൻ റജിസ്ട്രേഷൻ സമർപ്പിക്കാനുള്ള അവസാന തീയതി ഫെബ്രുവരി 8 വരെ നീട്ടി. വിശദ വിവരങ്ങൾക്ക് https://navodaya.gov.in, https://cbseitms.rcil.gov.in/nvs

പിഎസ് സി എൻഡുറൻസ് ടെസ്റ്റ്: ആലപ്പുഴ∙ ജില്ലയിൽ എക്സൈസ് വകുപ്പിൽ സിവിൽ എക്സൈസ് ഓഫിസർ (കാറ്റ. നം. 538/2019) തസ്തികയുടെ തിരഞ്ഞെടുപ്പുമായി ബന്ധപ്പെട്ട് 2ന് എൻഡുറൻസ് ടെസ്റ്റ് നടത്തുന്നു. രാവിലെ 5 മുതൽ മാരാരിക്കുളം ക്ഷേത്രത്തിനു സമീപമുള്ള കസ്തൂർബ സ്മാരക വായനശാലയിലാണ് ടെസ്റ്റ്. ഉദ്യോഗാർഥികൾ തിരിച്ചറിയൽ കാർഡ്, അഡ്മിഷൻ ടിക്കറ്റ് എന്നിവ സഹിതം എത്തണം.

മോഡൽ റസിഡൻഷ്യൽ സ്കൂൾ പ്രവേശനം: ആലപ്പുഴ∙ സംസ്ഥാനത്തെ മോഡൽ റസിഡൻഷ്യൽ സ്കൂളുകളിലെ 2023-24 അധ്യയന വർഷം 5,6 ക്ലാസുകളിലേക്ക് പ്രവേശനത്തിനായി അപേക്ഷ ക്ഷണിച്ചു. കുടുംബ വാർഷിക വരുമാനം 2 ലക്ഷം രൂപയിൽ കൂടാത്ത രക്ഷിതാക്കളുടെ മക്കൾക്ക് അപേക്ഷിക്കാം. അപേക്ഷ ഫോറം www.stmrs.in എന്ന വെബ്സൈറ്റിൽ നിന്നോ പുന്നപ്രയിലെ മോഡൽ റസിഡൻഷ്യൽ സ്കൂളിൽ നിന്നോ ലഭിക്കും. അപേക്ഷിക്കേണ്ട അവസാന തീയതി ഫെബ്രുവരി 20. 7902544637