അമ്പലപ്പുഴ ∙ നിയന്ത്രണംവിട്ട വാൻ ഇടിച്ച് സ്കൂട്ടർ യാത്രക്കാരനായ യുവാവ് മരിച്ചു. അമ്പലപ്പുഴ തെക്ക് 12ാം വാർഡ് കുമാരനിവാസിൽ എം.കൃഷ്ണചന്ദ്രൻ (22) ആണ് മരിച്ചത്. അമ്പലപ്പുഴതെക്ക് പഞ്ചായത്ത് അംഗം കെ. മനോജ്‌കുമാറിന്റെയും സജിതയുടെയും ഏകമകനാണ്. ദേശീയ പാതയിൽ പുന്നപ്ര പവർ ഹൗസിനു സമീപം ഇന്നലെ പുലർച്ചെ 6 ന് ആയിരുന്നു അപകടം. കേന്ദ്ര സേനയിലെ ജോലിക്കായുള്ള എഴുത്ത് പരീക്ഷയ്ക്ക് ആലുവയിലേക്ക് പോവുകയായിരുന്നു കൃഷ്ണചന്ദ്രൻ. അമ്പലപ്പുഴ ഭാഗത്തേക്ക് വന്ന വാൻ സ്കൂട്ടറിനെ ഇടിച്ച് തെറിപ്പിക്കുകയായിരുന്നു.   ഗുരുതര പരുക്കേറ്റ കൃഷ്ണചന്ദ്രനെ പുന്നപ്ര പൊലീസും നാട്ടുകാരും റോഡ് സേഫ്റ്റി ഫോഴ്സ് പ്രവർത്തകരും ചേർന്ന് മെഡിക്കൽ കോളജ് ആശുപത്രിയിലേക്ക് കൊണ്ടുപോകുന്ന വഴി മരിച്ചു. പുന്നപ്ര പൊലീസ് കേസെടുത്തു.‌