മിത്രപ്പുഴക്കടവിൽ സുരക്ഷയൊരുക്കണം

ചെങ്ങന്നൂർ ∙ ആയിരക്കണക്കിനു ശബരിമല തീർഥാടകരെത്തുന്ന മിത്രപ്പുഴക്കടവിൽ സുരക്ഷാ ക്രമീകരണങ്ങൾ ഏർപ്പെടുത്തണമെന്ന ആവശ്യം ശക്തമാകുന്നു. ഇന്നലെ ചെന്നൈ സ്വദേശി വി.ഗണേഷ് ഇവിടെ മുങ്ങിമരിച്ചു. കുളിക്കാനിറങ്ങുന്നവർ അപകടത്തിൽപെടുന്നത് ഒഴിവാക്കാൻ സ്റ്റീൽ വേലി സ്ഥാപിച്ചിട്ടുണ്ടെങ്കിലും ജലനിരപ്പ് ഉയർന്നു നിന്നതിനാലാണു ഗണേഷിനെ രക്ഷിക്കാൻ കഴിയാതെ പോയത്. സാധാരണ ഗതിയിൽ മണ്ഡല മകരവിളക്ക് ഉത്സവകാലത്തു മാത്രമേ കടവിൽ ഹോം ഗാർഡും സ്കൂബ ഡൈവർമാരും വള്ളവും ഉണ്ടാകൂ.

എന്നാൽ എല്ലാ മലയാള മാസത്തെയും ആദ്യ ദിനങ്ങളിലും ഏറെ തീർഥാടകർ എത്തുന്ന ചെങ്ങന്നൂരിലും മിത്രപ്പുഴക്കടവിലും കൂടുതൽ സുരക്ഷ ഒരുക്കേണ്ടിയിരിക്കുന്നു. കടവിൽ അപായസൂചന നൽകുന്ന ബോർഡ് ഉണ്ടെങ്കിലും ഫലമില്ല. സീസൺ കാലത്തിനു പുറമേ എല്ലാ മാസത്തെയും ആദ്യദിനങ്ങളിലും കടവിൽ ഡ്യൂട്ടിക്ക് ഉദ്യോഗസ്ഥരെ നിയോഗിക്കണം. കടവിൽ ജലനിരപ്പ് ഉയർന്നു നിൽക്കുമ്പോൾ നിലവിലെ വേലിക്കു പുറമേ താൽക്കാലിക വേലി സ്ഥാപിക്കുകയും ചെയ്യണം.