ദേശീയപാത നിർമാണം: കലുങ്ക് നിർമിക്കാനെടുത്ത കുഴി അപകടക്കെണി

ഹരിപ്പാട് ∙  ദേശീയപാതയിൽ കലുങ്ക് നിർമാണത്തിനായി എടുത്ത കുഴി അപകടക്കെണിയാകുന്നു. താലൂക്ക് ആശുപത്രി ജംക്‌ഷനിൽ നിന്ന് റവന്യു ടവറിലേക്കുള്ള റോഡിലാണ് അപകടം പതിയിരിക്കുന്ന കുഴിയുള്ളത്. ദേശീയപാതയിൽ കൂടി വരുന്ന വാഹനങ്ങൾ റവന്യു ടവർ, കോടതി പൊലീസ് സ്റ്റേഷൻ ബിഎസ്എൻഎൽ ഓഫിസ് എന്നിവിടങ്ങളിലേക്ക് പോകാൻ ആശ്രയിക്കുന്ന റോഡാണിത്.

പഴയ ദേശീയപാതയായ ഈ റോഡിൽ മുരളി ഹോട്ടലിനു സമീപമുള്ള കുഴിയുടെ വശങ്ങൾ  ഇടിഞ്ഞു വീണുകൊണ്ടിരിക്കുകയാണ്.  ഇപ്പോൾ റോഡിന്റെ പകുതിയിലധികം  ഇടിഞ്ഞുപോയി. ടാർ ചെയ്ത ഭാഗമാണ് ഇടിഞ്ഞുവീഴുന്നത്. ഇതുമൂലം എതിരെ വാഹനങ്ങൾ വന്നാൽ സൈഡ് കൊടുക്കാൻ കഴിയില്ല. ഇവിടെ ആവശ്യത്തിനുള്ള മുന്നറിയിപ്പ് സംവിധാനങ്ങൾ ഏർപ്പെടുത്തിയിട്ടില്ല. റോഡ് ഇടിഞ്ഞു വീഴുന്നത് ഒഴിവാക്കുന്നതിനുള്ള നടപടി സ്വീകരിക്കണം എന്നാണ് യാത്രക്കാരുടെ ആവശ്യം.