സിറ്റി റെയിൽവേ സ്റ്റേഷനിൽ ‘യുവി ബാഗേജ് ബാത്ത്

ബെംഗളൂരു ∙ യാത്രക്കാരുടെ ബാഗുകൾ അണുവിമുക്തമാക്കാൻ മജസ്റ്റിക് കെഎസ്ആർ സിറ്റി റെയിൽവേ സ്റ്റേഷനിൽ സ്ഥാപിച്ച ‘യു വി ബാഗേജ് ബാത്ത്’ കിയോസ്ക് സീനിയർ ഡിവിഷനൽ കൊമേഴ്സ്യൽ മാനേജർ എ.എൻ.കൃഷ്ണറെഡ്ഡി ഉദ്ഘാടനം ചെയ്തു. കിയോസ്കിലൂടെ കടന്നു പോകുന്ന ബാഗിന്റെ എല്ലാ ഭാഗവും അൾട്രാവയലറ്റ് രശ്മി അണുവിമുക്തമാക്കുമെന്നു ദക്ഷിണ പശ്ചിമ റെയിൽവേ ബെംഗളൂരു ഡിവിഷൻ അറിയിച്ചു.

സ്പെഷൽ ട്രെയിൻ ഉൾപ്പെടെ നിലവിൽ സർവീസ് നടത്തുന്ന ട്രെയിനുകളെല്ലാം പുറപ്പെടുകയും എത്തിച്ചേരുകയും ചെയ്യുന്നത് 5, 6, 7, 8 പ്ലാറ്റ് ഫോമുകളിലായതിനാൽ റെയിൽവേ സ്റ്റേഷന്റെ പിൻഭാഗത്തുള്ള കവാടത്തിനു സമീപമാണ് കിയോസ്ക് സ്ഥാപിച്ചിരിക്കുന്നത്. നിലവിൽപണം ഈടാക്കുന്നില്ല. യശ്വന്ത്പുര സ്റ്റേഷനിലും യു വി ബാഗേജ് ബാത്ത് സ്ഥാപിക്കുമെന്ന് അധികൃതർ പറഞ്ഞു.