വിവാഹ വാഗ്ദാന ലംഘനം വഞ്ചനക്കുറ്റമല്ല: ഹൈക്കോടതി

ബെംഗളൂരു ∙‌ വിവാഹ വാഗ്ദാനം നൽകി കബളിപ്പിക്കുന്നതിനെ ഇന്ത്യൻ ശിക്ഷാ നിയമത്തിലെ വഞ്ചനക്കുറ്റമായി പരിഗണിക്കാനാകില്ലെന്ന് ഹൈക്കോടതി. 8 വർഷം പ്രണയിച്ചയാൾ വാഗ്ദാനം ലംഘിച്ച് മറ്റൊരാളെ വിവാഹം കഴിച്ചെന്നു ചൂണ്ടിക്കാട്ടി യുവതിയുടെ പരാതിയിൽ റജിസ്റ്റർ ചെയ്ത കേസ് റദ്ദാക്കണമെന്ന് ആവശ്യപ്പെട്ട് കെആർ പുരം സ്വദേശി വെങ്കടേഷ് സമർപ്പിച്ച ഹർജിയിലാണ് ഉത്തരവ്. വിവാഹ ഉടമ്പടി റജിസ്റ്റർ ചെയ്ത ശേഷം ലംഘിച്ചാൽ മാത്രമേ 415–ാം വകുപ്പു പ്രകാരമുള്ള വഞ്ചനക്കുറ്റമായി പരിഗണിക്കാനാവൂ എന്ന് ജസ്റ്റിസ് കെ.നടരാജൻ വിലയിരുത്തി.

രാമമൂർത്തി നഗർ സ്വദേശിനിയായ യുവതി വെങ്കടേഷിനും കുടുംബാംഗങ്ങൾക്കും എതിരെ നൽകിയ പരാതിയിൽ 2020 മേയ് 5നാണ് പൊലീസ് കേസെടുത്തത്. തുടർന്നാണ് ഇതിനെ ചോദ്യംചെയ്ത് വെങ്കടേഷ് ഹൈക്കോടതിയെ സമീപിച്ചത്.