അറ്റകുറ്റപ്പണി, മേൽപാലം; ജംക്‌ഷനുകളിൽ നവീകരണം
Mail This Article
ബെംഗളൂരു∙നഗരത്തിലെ ഗതാഗതക്കുരുക്ക് അഴിക്കാൻ 3 ജംക്‌ഷനുകളിൽ അടിയന്തര നടപടി. ഗോരെഗുണ്ഡപാളയ, ഹെബ്ബാൾ, ടിൻ ഫാക്ടറി ജംക്‌ഷനുകളിലാകും നടപടികൾ സ്വീകരിക്കുക. കഴിഞ്ഞ ദിവസം ബിബിഎംപി, ബിഡിഎ, ബിഎംആർസി, പൊലീസ് അധികൃതർ ജംക്‌ഷനുകളിലെത്തി പരിശോധന നടത്തിയിരുന്നു.
തിരക്കു കുറയ്ക്കാനുള്ള ദീർഘ, ഹ്രസ്വ കാല പദ്ധതികൾക്കു രൂപം നൽകിയിട്ടുണ്ട്. ഇതിനായുള്ള നിർമാണം ഉടൻ ആരംഭിക്കുമെന്നു ബിബിഎംപി ചീഫ് കമ്മിഷണർ തുഷാർ ഗിരിനാഥ് പറഞ്ഞു. ഗോരെഗുണ്ഡപാളയ ജംക്‌ഷനിലെ റോഡ് അറ്റകുറ്റപ്പണികൾ നടത്തി നവീകരിക്കും. കൂടുതൽ മേൽപാലങ്ങളും നടപ്പാതകളും നിർമിക്കും. വലിയ വാഹനങ്ങളെ പീനിയ ഫ്ലൈഓവർ ഉപയോഗിക്കാൻ അനുവദിക്കണമെന്നു ദേശീയപാത അതോറിറ്റിയോട് ആവശ്യപ്പെടും.
സുരക്ഷാ കാരണങ്ങൾ ചൂണ്ടിക്കാട്ടി 6 മാസങ്ങളായി ഇതു നിരോധിച്ചിരിക്കുകയാണ്. പീനിയ സ്റ്റാൻഡിലേക്കുള്ള ദീർഘദൂര ബസുകളുടെ പ്രവേശനം നിർത്തുന്നതിനുള്ള മാർഗങ്ങളും ആലോചിക്കുന്നുണ്ട്. ടിൻ ഫാക്ടറിയിൽ പ്രധാന റോഡുകളിൽ ബസ് പാർക്ക് ചെയ്യുന്നത് ഒഴിവാക്കാൻ നടപടികൾ സ്വീകരിക്കും. തെരുവുവിളക്കുകൾ സ്ഥാപിക്കും. ഹെബ്ബാളിൽ റോഡുകളുടെ വീതി കൂട്ടും. മരങ്ങളുടെ ശാഖകൾ വെട്ടിയൊതുക്കും. ബസുകൾക്കു പാർക്കിങ് സൗകര്യങ്ങൾ കണ്ടെത്തുമെന്നും അധികൃതർ അറിയിച്ചു.
