തിരഞ്ഞെടുപ്പ് ഒരുക്കം വിലയിരുത്താൻ അമിത് ഷാ നാളെ കർണാടകയിൽ

ബെംഗളൂരു ∙ നിയമസഭാ തിരഞ്ഞെടുപ്പു പ്രചാരണ മുന്നൊരുക്കങ്ങൾ വിലയിരുത്താൻ കേന്ദ്ര ആഭ്യന്തര മന്ത്രി അമിത് ഷാ നാളെ വീണ്ടുമെത്തുന്നു. ഒരു മാസത്തിനിടെയുള്ള രണ്ടാമത്തെ സന്ദർശനമാണിത്. നാളെയും 28നും വടക്കൻ കർണാടകയിലെ ഹുബ്ബള്ളിയും ബെളഗാവിയും സന്ദർശിക്കുന്ന അദ്ദേഹം  പൊതുറാലികളിൽ പങ്കെടുക്കുന്നതിനു പുറമേ മുതിർന്ന നേതാക്കളുമായും കൂടിക്കാഴ്ച നടത്തും. കഴിഞ്ഞ മാസം മണ്ഡ്യ സന്ദർശിച്ച അമിത്ഷാ ബിജെപിക്ക് താരതമ്യേന സ്വാധീനം കുറവുള്ള വൊക്കലിഗ വോട്ടുബാങ്കായ പഴയ മൈസൂരു മേഖലയിലെ പ്രവർത്തനങ്ങൾ വിലയിരുത്തിയിരുന്നു.