ബെംഗളൂരു ∙ കാവേരി പ്രക്ഷോഭം രൂക്ഷമായതിനെ തുടർന്നുള്ള ബെംഗളൂരു ബന്ദിനിടെ, തമിഴ്നാടിന് 18 ദിവസത്തേക്ക് 3,000 ക്യുസെക് (ഘനയടി) ജലം വീതം വിട്ടുകൊടുക്കാൻ കാവേരി നദീജല നിയന്ത്രണ സമിതി (സിഡബ്ല്യുആർസി) നിർദേശിച്ചു. കൃഷ്ണഗിരിയിലെ ബിലിഗുണ്ടലു അണക്കെട്ടിൽ നിന്ന് നാളെ മുതൽ ഒക്ടോബർ 15 വരെ ജലം നൽകാനാണ് നിർദേശം. ഇന്നലെ നടന്ന സമിതി യോഗത്തിൽ 12,500 ക്യുസെക് ജലം കൂടി തമിഴ്നാട് ആവശ്യപ്പെട്ടു. എന്നാൽ കൂടുതൽ ജലം നൽകാനുള്ള സാഹചര്യമല്ല അണക്കെട്ടുകളിലേതെന്ന് കർണാടക വാദിച്ചതോടെയാണ്, നിലവിൽ പ്രതിദിനം നൽകുന്ന 5,000 ക്യുസെക്കെന്നത് 3000 ആയി കുറച്ചത്.