കോടതി പരാമർശം: വിജയ്യുടെ അപ്പീലിൽ വാദം ഉടൻ
Mail This Article
ചെന്നൈ ∙ നികുതി ഇളവു തേടിയ തനിക്കെതിരെയുണ്ടായ കോടതി പരാമർശങ്ങളും ചുമത്തിയ പിഴയും നീക്കണമെന്നാവശ്യപ്പെട്ടു നടൻ വിജയ് സമർപ്പിച്ച അപ്പീലിൽ മദ്രാസ് ഹൈക്കോടതി ഉടൻ വാദം കേൾക്കും. ആദ്യ ഉത്തരവിന്റെ സാക്ഷ്യപ്പെടുത്തിയ പകർപ്പു ലഭിക്കാൻ വൈകുന്ന സാഹചര്യത്തിൽ വെബ് കോപ്പി സ്വീകരിച്ചു വാദം കേൾക്കണമെന്ന വിജയ്യുടെ ആവശ്യം ഹൈക്കോടതി അംഗീകരിച്ചു. ഈ മാസം 8ന് പുറപ്പെടുവിച്ച ഉത്തരവിന്റെ പകർപ്പു സാക്ഷ്യപ്പെടുത്തി ഇതുവരെ ലഭിച്ചിട്ടില്ലെന്നും ലഭിക്കുന്ന മുറയ്ക്കു കോടതിയിൽ സമർപ്പിക്കാമെന്നുമുള്ള വിജയ്യുടെ അഭിഭാഷകന്റെ അപേക്ഷ കോടതി അംഗീകരിക്കുകയായിരുന്നു.
യുകെയിൽ നിന്ന് ഇറക്കുമതി ചെയ്ത കാറിന്റെ പ്രവേശന നികുതി ഒഴിവാക്കണമെന്ന് ആവശ്യപ്പെട്ട വിജയ്യെ അതിരൂക്ഷ ഭാഷയിൽ വിമർശിച്ച ഹൈക്കോടതി ഒരു ലക്ഷം രൂപ പിഴ ചുമത്തിയിരുന്നു. ഇതിനെതിരെയാണു നടൻ അപ്പീൽ സമർപ്പിച്ചത്. ജസ്റ്റിസുമാരായ എം.ദുരൈസ്വാമി, ആർ.ഹേമലത എന്നിവരുടെ ബെഞ്ചാണു വിജയ്യുടെ അപ്പീൽ പരിഗണിക്കുക.