പ്രതിദിന വൈദ്യുതി ഉപയോഗം 9.16 കോടി യൂണിറ്റ് റെക്കോർഡിട്ട് റീഡിങ്; കുതിച്ചുയർന്ന് ചൂട്
Mail This Article
ചെന്നൈ ∙ ചരിത്രത്തിലാദ്യമായി നഗരത്തിലെ പ്രതിദിന വൈദ്യുതി ഉപയോഗം 9.16 കോടി യൂണിറ്റ് കടന്നു. വ്യാഴാഴ്ച മാത്രം ചെന്നൈ നഗരത്തിൽ 3872 മെഗാവാട്ട് വൈദ്യുതി ഉപയോഗിച്ചതായാണ് കണക്ക്. ഇതിനു മുൻപ് ഏറ്റവും കൂടിയ വൈദ്യുതി ഉപയോഗം രേഖപ്പെടുത്തിയത് കഴിഞ്ഞ 2നായിരുന്നു.
9.06 കോടി യൂണിറ്റാണ് അന്നത്തെ ഉപയോഗം.നഗരവാസികൾക്ക് ആവശ്യമായ വൈദ്യുതി യാതൊരു തടസ്സവും കൂടാതെ ലഭ്യമാക്കാൻ സാധിച്ചതായി വൈദ്യുതി വകുപ്പ് മന്ത്രി വി.സെന്തിൽ ബാലാജി പറഞ്ഞു. ആഴ്ചകളായി തുടരുന്ന കടുത്ത ചൂടാണ് വൈദ്യുതി ഉപയോഗം കൂടാനുള്ള പ്രധാന കാരണം.
വീണ്ടും 41 ഡിഗ്രി
കഴിഞ്ഞ തിങ്കൾ, ചൊവ്വ ദിവസങ്ങളിൽ നഗരത്തിൽ പരക്കെ മഴ ലഭിച്ചതിനെ തുടർന്ന് അൽപം കുറഞ്ഞ താപനില വെള്ളിയാഴ്ചയോടെ വീണ്ടും വർധിച്ചു. നുങ്കംപാക്കത്ത് രേഖപ്പെടുത്തിയ ഉയർന്ന താപനില 41.1 ഡിഗ്രി സെൽഷ്യസാണ്. അടുത്ത ഏതാനും ദിവസങ്ങളിൽ താപനില 2 – 3 ഡിഗ്രി സെൽഷ്യസ് വരെ ഉയരാൻ സാധ്യതയുള്ളതായി മേഖലാ കാലാവസ്ഥാ കേന്ദ്രം അറിയിച്ചു.