ചെന്നൈ ∙ ഡെങ്കിപ്പനി ബാധിച്ച് തിരുപ്പത്തൂരിൽ 5 വയസ്സുകാരി മരിച്ചു. മണികണ്ഠൻ–സുമിത്ര ദമ്പതികളുടെ മകൾ അഭിനിധിയാണു മരിച്ചത്. ഏതാനും ദിവസം മുൻപു പനി ബാധിച്ച അഭിനിധിയെ ആശുപത്രിയിൽ പ്രവേശിപ്പിച്ചിരുന്നെങ്കിലും പിന്നീട് ഭേദപ്പെട്ടതിനെ തുടർന്നു വീട്ടിലേക്കു തിരികെയെത്തിയിരുന്നു. എന്നാൽ 26നു വീണ്ടും പനിയും ഛർദിയും അനുഭവപ്പെട്ടതിനെ തുടർന്ന് ആശുപത്രിയിൽ പ്രവേശിപ്പിക്കുകയായിരുന്നു.

സംസ്ഥാനത്ത് ഈ വർഷം ഡെങ്കിപ്പനി ബാധിച്ച് 4 പേരാണ് മരിച്ചത്. മുൻ വർഷത്തെ അപേക്ഷിച്ച് ഡെങ്കിപ്പനി വ്യാപനം ഇത്തവണ കൂടുതലാണ്. പ്രതിരോധനടപടികൾ ഊർജിതമാക്കുന്നതിന്റെ ഭാഗമായി ഒക്ടോബർ ഒന്നു മുതൽ സംസ്ഥാനത്തുടനീളം 1,000 മെഡിക്കൽ ക്യാംപുകൾ സംഘടിപ്പിക്കും.