ബാങ്ക് അക്കൗണ്ട് ഇല്ല, തകരപ്പാട്ടയിലാക്കി കുഴിച്ചിട്ട ഒരു ലക്ഷം രൂപ ചിതലരിച്ചു; ഹൃദയം തകർന്ന് മുത്തു കറുപ്പി

ചെന്നൈ ∙ ചോർച്ചയില്ലാത്ത വീടൊരുക്കാൻ സ്വരുക്കൂട്ടിവച്ചിരുന്ന പണം ചിതലരിച്ചു പോയതിന്റെ സങ്കടത്തിലാണ് ശിവഗംഗയിലെ കൂലിത്തൊഴിലാളിയായ മുത്തു കറുപ്പി. 3 മക്കൾക്കൊപ്പം കുടിലിൽ കഴിയുന്ന ഇവർ കടുത്ത ദാരിദ്യ്രത്തിനിടയിൽ സമാഹരിച്ച പണമാണു ചിതൽ തിന്നത്. ബാങ്ക് അക്കൗണ്ട് ഇല്ലാത്തതിനാൽ മിച്ചം പിടിക്കുന്ന തുക തകരപ്പാട്ടയിലാക്കി മണ്ണിൽ കുഴിച്ചിടുകയായിരുന്നു പതിവ്.

ഒരു വർഷം കൊണ്ട് ശേഖരിച്ച ഒരു ലക്ഷത്തോളം രൂപയാണു നഷ്ടമായത്. സമ്പാദ്യമെല്ലാം പാഴായതിനാൽ  എന്തുചെയ്യണമെന്നറിയാതെ കരയുന്ന യുവതിയെയും മക്കളെയും സഹായിക്കാൻ ബാങ്ക് അധികൃതർ വരുമെന്നാണ് നാട്ടുകാരുടെ പ്രതീക്ഷ.