നെറ്റ് സൗകര്യമായി, അശ്വിൻ ടെറസിൽ നിന്നു മുറിയിലേക്ക്

കളമശേരി ∙ ഓൺലൈൻ ക്ലാസ് തുടങ്ങുമ്പോൾ മൊബൈൽ ഫോണെടുത്ത് അശ്വിന് വീടിന്റെ രണ്ടാം നിലയുടെ മുകളിൽ ടെറസിലേക്ക് ഇന്നുമുതൽ ഓടിക്കയറണ്ട. വീടിനകത്തിരുന്നു തന്നെ ഓൺലൈനിൽ പഠിക്കാം. വീടിനുള്ളിൽ ഇന്റർനെറ്റ് ‍‍‍കണക്ടിവിറ്റി ലഭ്യമല്ലാത്തതിനാൽ റേഞ്ച് കിട്ടുന്നതിന് വീടിന്റെ മുകളിൽ കയറി നിന്ന് പഠിക്കുന്ന മുപ്പത്തടം എംകെകെ നഗറിൽ കൈലാസം വീട്ടിലെ അശ്വിന്റെ ബുദ്ധിമുട്ട് മനോരമയിലൂടെ വായിച്ചറിഞ്ഞ റിലയൻസ് ജിയോയുടെ കളമശേരി ജിയോ സെന്ററിലെ ടെക്നീഷ്യന്മാരെത്തി അശ്വിന് സൗജന്യമായി വൈഫൈ സൗകര്യങ്ങളും നെറ്റ് കിട്ടുന്നതിനാവശ്യമായ സജ്ജീകരണങ്ങളും ഒരുക്കി നൽകി. കുടുതൽ സൗകര്യം ഇന്നു ഒരുക്കുമെന്നും അവർ അറിയിച്ചു. കളമശേരി രാജഗിരി സ്കൂളിലെ മൂന്നാം ക്ലാസ് വിദ്യാർഥിയാണ് അശ്വിൻ.