കരുണാലയത്തിൽ മാതൃദിന ആഘോഷവുമായി ഉമ തോമസ്

കൊച്ചി ∙ മാതൃദിനം ആഘോഷിക്കാൻ തൃക്കാക്കര മുണ്ടംപാലത്തെ കരുണാലയത്തിലെത്തിയ യുഡിഎഫ് സ്ഥാനാർഥി ഉമ തോമസിന്റെ മനസ്സിലെ ശൂന്യത പി.ടി. തോമസ് ആയിരുന്നു. കോവിഡ് കാലത്ത് ഇവിടെ അന്തേവാസികൾക്കു രോഗം ബാധിച്ചപ്പോൾ പി. ടി. തോമസ് മുൻകൈയെടുത്ത് ജില്ലാ കലക്ടറുമായി സംസാരിച്ച് കരുണാഭവൻ ജില്ലയിലെ ആദ്യ എഫ്എൽടിഎസ് ആയി പ്രഖ്യാപിച്ചു. കരുണാലയത്തിലെ വൈദ്യുതി ക്ഷാമം പരിഹരിക്കാൻ ട്രാൻസ്ഫോർമർ വയ്ക്കാൻ എംഎൽഎ ഫണ്ട് അനുവദിച്ചതും പിടി യാണ്. ആ ഓർമകളിൽ അന്തേവാസികൾ സ്ഥാനാർഥിയെ സ്വീകരിച്ചു.

കളമശേരി സെന്റ് പോൾസ് കോളജിൽ കൊല്ലം സ്വദേശിയായ ഏഴു വയസുകാരൻ ശ്രീ നന്ദനു മൂലകോശ ദാതാവിനെ കണ്ടെത്താൻ നടത്തിയ ക്യാംപിൽ ഉമ പങ്കെടുത്തു. മൂല കോശ ദാനത്തിനു സ്വാബ് നൽകി.എളംകുളം ചെറുപുഷ്പം പള്ളി, ഫാത്തിമ ചർച്ച്, കടവന്ത്ര സെന്റ് ജോസഫ്സ് ചർച്ച്, തമ്മനം പള്ളിനട, പാലാരിവട്ടം സെന്റ് മാർട്ടിൻ പള്ളി, മാമംഗലം മൗണ്ട് കാർമൽ പള്ളി, വാഴക്കാല സെന്റ് ജോസഫ്സ് ചർച്ച് എന്നിവിടങ്ങളിൽ വോട്ടർമാരെ കണ്ട് പിന്തുണ തേടിയ ഉമ ഫ്രണ്ട്സ് ഓഫ് പിടി സംഘടിപ്പിച്ച പരിപാടിയിലും കേരള കാത്തലിക് അസോസിയേഷൻ പരിപാടിയിലും പങ്കെടുത്തു. ഇടപ്പള്ളി, പാലാരിവട്ടം, തൃക്കാക്കര സെൻട്രൽ മണ്ഡലം കൺവൻഷനുകളിലും തുതിയൂർ ബൂത്ത് കമ്മിറ്റി ഓഫിസ് ഉദ്ഘാടനത്തിലും പങ്കെടുത്തു.