സ്റ്റേ കമ്പിക്കു പകരം പ്ലാസ്റ്റിക് കയർ; വൈദ്യുത പോസ്റ്റ് അപകടാവസ്ഥയിൽ

കൂത്താട്ടുകുളം ∙ സ്റ്റേ കമ്പിക്കു പകരം ഒരു വർഷമായി പ്ലാസ്റ്റിക് കയറു കൊണ്ട് കെട്ടിയിട്ടിരിക്കുന്ന വൈദ്യുത പോസ്റ്റ് ചരിഞ്ഞ് അപകടാവസ്ഥയിൽ. ഒലിയപ്പുറം നിരപ്പത്താഴം–കട്ടേമല റോഡിൽ പൂതക്കുഴിക്ക് സമീപം മൂഴിക്കുന്നത്ത് ശ്രീധരന്റെ പുരയിടത്തിലാണ് പോസ്റ്റ് കയർ കൊണ്ട് കെട്ടിയിട്ട് ഒരു വർഷം മുൻപ് ഉദ്യോഗസ്ഥർ സ്ഥലം വിട്ടത്.

കഴിഞ്ഞ വർഷം കാറ്റിലും മഴയിലും മരം വീണ് ചരിഞ്ഞ പോസ്റ്റ് നിവർത്തിയാണ് സ്റ്റേ ഇല്ലാതെ കയർ കെട്ടിയത്. പശുവിനെ കെട്ടാൻ വച്ചിരുന്ന കയർ കൊണ്ട് പോസ്റ്റ് അടുത്തുള്ള റബർ മരത്തിൽ ബന്ധിച്ച് ഉദ്യോഗസ്ഥർ മടങ്ങി. അടുത്ത ദിവസം തന്നെ സ്റ്റേ സ്ഥാപിക്കുമെന്ന് പറഞ്ഞു പോയവരെ ഈ വഴി കണ്ടിട്ടില്ലെന്നും പല തവണ പരാതിപ്പെട്ടിട്ട് നടപടി ആയില്ലെന്നും ശ്രീധരൻ പറയുന്നു.