പറവൂർ താലൂക്കിൽ 2 ക്യാംപുകൾ മാത്രം

പറവൂർ ∙ ശക്തമായ മഴയെത്തുടർന്നു താലൂക്കിൽ ആരംഭിച്ച ക്യാംപുകളിൽ രണ്ടെണ്ണം ഒഴികെ മറ്റെല്ലാം പ്രവർത്തനം നിർത്തി. നിലവിൽ കുത്തിയതോട് സെന്റ് ഫ്രാൻസിസ് എൽപിഎസിലും ചാലാക്ക ജിഎൽപിഎസിലുമാണു ക്യാംപുകൾ പ്രവർത്തിക്കുന്നത്. കുത്തിയതോട് 20, ചാലാക്കയിൽ 62 കുടുംബങ്ങളുണ്ട്. 

പുത്തൻവേലിക്കരയിലെ തെനപ്പുറം, കോഴിത്തുരുത്ത് തുടങ്ങിയ നിവാസികളാണു ക്യാംപുകളിൽ കഴിയുന്നവരിൽ ഏറെ. മറ്റെല്ലാവരും വീടുകളിലേക്കു മടങ്ങി. രണ്ടിടത്തുമായി ഇനിയും അൽപം വെള്ളം ഇറങ്ങാനുണ്ട്. വെള്ളം ഇറങ്ങിയ സ്ഥലങ്ങളിൽ ശുചീകരണ പ്രവർത്തനങ്ങൾ നടന്നുവരികയാണ്. വീടുകളുടെ ശുചീകരണം പൂർത്തിയാകാത്തതിനാലാണു ചിലർ ക്യാംപുകളിൽ തുടരുന്നത്. താലൂക്കിൽ 16 ക്യാംപുകൾ വരെ തുറന്നിരുന്നു.