കാര്യങ്ങൾ കനത്ത വോൾട്ടേജിൽ: ട്രാൻസ്ഫോമറിൽ കയറി പെരുമ്പാമ്പ്; നാട്ടുകാർ ഇടപെട്ടു ‘പുറത്തിറക്കി’

വരാപ്പുഴ ∙ കെഎസ്ഇബി ഓഫിസിനു മുന്നിലെ ട്രാൻസ്ഫോമറിൽ കയറിയ പെരുമ്പാമ്പിനെ നാട്ടുകാർ ഇടപെട്ടു ‘പുറത്തിറക്കി’.  കഴിഞ്ഞ ദിവസം ഉച്ചയോടെയാണ് വരാപ്പുഴ കെഎസ്ഇബി ഓഫിസിനു മുന്നിലെ ട്രാൻസ്ഫോമറിൽ പെരുമ്പാമ്പ് എത്തിയത്. സമീപത്തുള്ള പറമ്പിലെ പുല്ല് വെട്ടിയ തൊഴിലാളിയാണു പാമ്പിനെ ആദ്യം കണ്ടത്. പറമ്പിൽ നിന്നു കിട്ടിയ ഓലമടൽ ഉപയോഗിച്ചു പാമ്പിനെ ട്രാൻസ്ഫോമറിൽ നിന്നു കുത്തി താഴേക്കിടാൻ ശ്രമിച്ചെങ്കിലും നടന്നില്ല. നാട്ടുകാരിൽ ഒരാൾ കയർ കൊണ്ടു കുരുക്കുണ്ടാക്കി പാമ്പിന്റെ തലയിൽ കുരുക്കി വലിച്ചു താഴേക്കിട്ടു. തുടർന്നു പാമ്പിനെ വനംവകുപ്പ് അധികൃതർക്കു കൈമാറി.