ഗജവീരൻ കബർ വണങ്ങി; കന്നി 20 പെരുന്നാൾ സമാപിച്ചു

കോതമംഗലം∙ തീർഥാടന കേന്ദ്രമായ മാർ തോമാ ചെറിയപള്ളിയിൽ ചരിത്രപ്രസിദ്ധമായ കന്നി 20 പെരുന്നാൾ സമാപനത്തിനു പരിശുദ്ധ യെൽദോ മാർ ബസേലിയോസ് ബാവായുടെ കബറിടം വണങ്ങാൻ പതിവു തെറ്റിക്കാതെ ഗജവീരൻ എത്തി. കരിമണ്ണൂർ ഉണ്ണി എന്ന ആനയാണ് ഇക്കുറി കബർ വണങ്ങിയത്. വികാരി ഫാ. ജോസ് പരത്തുവയലിന്റെ നേതൃത്വത്തിൽ പള്ളി ഭാരവാഹികൾ പഴവും ശർക്കരയും നൽകി സ്വീകരിച്ചു. പ്രത്യേകം തയാറാക്കിയ പെട്ടിയിൽ വഴിപാട് സമർപ്പിച്ച ശേഷമായിരുന്നു ആനയുടെ കബർ വണങ്ങൽ. 10 ദിനം നീളുന്ന പെരുന്നാളിന്റെ സമാപനത്തിൽ എല്ലാ വർഷവും നാട്ടിലെ ആനകൾ കബർ വണങ്ങാൻ എത്താറുണ്ട്.