റെയിൽവേ ട്രാക്ക് പരിസരത്ത് രാത്രി സാമൂഹികവിരുദ്ധ ശല്യം; വീടിനു നേരെ ആക്രമണം
Mail This Article
ചെങ്ങമനാട്∙ പുറയാർ മസ്ജിദിന് സമീപത്തെ റെയിൽവേ ട്രാക്ക് പരിസരത്ത് രാത്രി സാമൂഹികവിരുദ്ധ ശല്യം രൂക്ഷമായി.
മസ്ജിദിന് സമീപത്തെ മഠത്തിലകത്തൂട്ട് മുഹമ്മദിന്റെ വീടിന് നേരെ വ്യാഴാഴ്ച രാത്രി അജ്ഞാതർ കല്ലെറിഞ്ഞ് ജനൽച്ചില്ലുകൾ പൊട്ടിച്ചു.
ട്രാക്കിനടുത്തുള്ള കുറ്റിക്കാട്ടിൽ നിന്നായിരുന്നു ആക്രമണം. ഭയന്ന് വിറച്ച വീട്ടുകാർ പുറത്തേക്ക് ഓടിയതോടെ അക്രമികൾ ആലുവ–കാലടി റോഡിൽ നിന്ന് ബൈക്കുകളിൽ രക്ഷപ്പെട്ടുവെന്ന് മുഹമ്മദ് പറഞ്ഞു.
വിവരമറിഞ്ഞ് നാട്ടുകാർ റെയിൽവേ ട്രാക്കിലും പരിസരത്തും അന്വേഷിച്ചെങ്കിലും ആരെയും കണ്ടെത്താനായില്ല. പൊലീസും സ്ഥലത്തെത്തി പരിശോധന നടത്തി. ട്രാക്കിന് ഇരുവശവും കുറെ നാളായി കാട് മൂടിയ നിലയിലാണ്.
കാട് വെട്ടിത്തെളിക്കണമെന്ന് റെയിൽവേ അധികൃതരോട് ഒട്ടേറെത്തവണ ആവശ്യപ്പെട്ടിട്ടും നടപടി ഉണ്ടാകുന്നില്ലെന്ന് ചെങ്ങമനാട് പഞ്ചായത്ത് സ്ഥിരം സമിതി അധ്യക്ഷൻ നൗഷാദ് പാറപ്പുറം ചൂണ്ടിക്കാട്ടി