സ്പെഷൽ ഒളിംപിക്സിൽ പങ്കെടുക്കാൻ പ്രജിത ചന്ദ്രൻ ഇന്നു പുറപ്പെടും

നെടുമ്പാശേരി ∙ ജർമനിയിൽ നടക്കുന്ന സ്പെഷൽ ഒളിംപിക്സിൽ പങ്കെടുക്കാൻ പ്രജിത ചന്ദ്രൻ ഇന്ന്  പുറപ്പെടും. ഇന്ത്യയ്ക്കു വേണ്ടി ഹാൻഡ്ബോൾ മത്സരത്തിൽ പങ്കെടുക്കുന്ന പ്രജിത മേയ്ക്കാട് കാരയ്ക്കാട്ടുകുന്ന് എടയാട്ട് പരേതനായ ചന്ദ്രന്റെയും ഷീലയുടെയും മകളാണ്.

2015 മുതൽ കാലടി പൊതിയക്കര സ്നേഹഭവൻ സ്പെഷൽ സ്കൂൾ വിദ്യാർഥിനിയായ പ്രജിത അവിടെയാണ് ഹാൻഡ് ബോളിൽ പരിശീലനം നേടിയത്. ഇക്കഴിഞ്ഞ ജനുവരി, മാർച്ച് മാസങ്ങളിൽ മഹാരാഷ്ട്ര, ഹരിയാന എന്നിവിടങ്ങളിൽ നടന്ന ദേശീയ ക്യാംപുകളിൽ മികച്ച പ്രകടനം കാഴ്ച വെച്ചു. ഏപ്രിലിൽ ആണ് സ്പെഷൽ ഒളിംപിക്സിലേയ്ക്ക് തിരഞ്ഞെടുത്തത്. 

എട്ട് അംഗങ്ങളുളള ഹാൻഡ് ബോൾ ടീമിൽ മലയാളികൾ 2 പേർ കൂടിയുണ്ട്. അടിമാലി, പാലാ സ്പെഷൽ സ്കൂളുകളിൽ നിന്നുള്ളവരാണ് അവർ. ബാക്കിയുള്ളവർ മറ്റ് സംസ്ഥാനക്കാരാണ്. സ്പെഷൽ ഒളിംപിക്സിൽ പങ്കെടുക്കാൻ കേരളത്തിൽ നിന്ന് 24 പേരുണ്ട്. 16  വർഷം മുൻപ് പ്രജിതയുടെ പിതാവ് ചന്ദ്രൻ മരിച്ചു. പിന്നീട് അമ്മ ഷീലയാണ് പ്രജിതയെ വളർത്തിയത്. സഹോദരൻ പ്രിജിത്ത്.