പെരുമ്പാവൂർ ∙ വിൽപനയ്ക്കായി സൂക്ഷിച്ച 9 ഗ്രാം ഹെറോയിനുമായി 2 അതിഥിത്തൊഴിലാളികൾ അറസ്റ്റിൽ. അസാം മാരിഗൗൻ സ്വദേശി റബുൽ ഇസ്‌ലാം (37), ദുപാരിത്തുർ സ്വദേശി മക്സിദുൽ ഹഖ് (23) എന്നിവരാണു പിടിയിലായത്. പോഞ്ഞാശേരി ഭാഗത്ത് വാടക വീട്ടിൽ ബാഗിൽ പ്രത്യേകം പൊതിഞ്ഞ് സൂക്ഷിച്ച നിലയിലാണ് കണ്ടെത്തിയത്. അസമിൽ നിന്നുമാണ് കൊണ്ടുവന്നത്. അതിഥിത്തൊഴിലാളികൾക്കിടയിലാണു വിൽപന. ഇൻസ്പെക്ടർ ആർ.രഞ്ജിത്ത്, എസ്.ഐ ജോസി.എം.ജോൺസൻ, എഎസ്ഐമാരായ ജോബി മത്തായി, മുജീബ് സിപിഒ കെ.എ. അഭിലാഷ് എന്നിവരാണ് അന്വേഷണ സംഘത്തിലുണ്ടായിരുന്നത്. റിമാൻഡ് ചെയ്തു.കഴിഞ്ഞ ദിവസം പെരുമ്പാവൂരിൽ പൊലീസ് നടത്തിയ പരിശോധനയിൽ 7000 പായ്ക്കറ്റ് നിരോധിത പുകയില ഉൽപന്നങ്ങൾ പിടികൂടിയിരുന്നു.