കളമശേരി മെട്രോ സ്റ്റേഷനിൽ മരപ്പട്ടി കുടുങ്ങി; യാത്രക്കാരും ഉദ്യോഗസ്ഥരും വലഞ്ഞു

കളമശേരി ∙ മെട്രോ സ്റ്റേഷനിൽ മരപ്പട്ടി കുടുങ്ങിയതു യാത്രക്കാരെയും ഉദ്യോഗസ്ഥരെയും ഒരുപോലെ വലച്ചു. വൈകിട്ട് ആറരടെയായിരുന്നു സംഭവം. സ്റ്റേഷനിലെ വൈദ്യുത പൈപ്പുകളിലൂടെ ഓടിനടന്ന മരപ്പട്ടി യാത്രക്കാരാണ് ആദ്യം കണ്ടത്. വിവരമറിഞ്ഞു മെട്രോസ്റ്റേഷനിലെ ഉദ്യോഗസ്ഥരും സുരക്ഷാ ഡ്യൂട്ടിയുള്ള പൊലീസും ജാഗ്രതയിലായി. യാത്രക്കാരെ നിയന്ത്രിച്ചു കടത്തിവിട്ട ഉദ്യോഗസ്ഥർ മരപ്പട്ടിക്കു പുറത്തേക്കു പോകാനുള്ള വഴിയൊരുക്കി നൽകി. അരമണിക്കൂറോളം നടത്തിയ ശ്രമത്തിനൊടുവിൽ മരപ്പട്ടി സുരക്ഷിതമായി സ്റ്റേഷനു പുറത്തേക്ക് ഓടിപ്പോയി.