സൗന്ദര്യവൽക്കരണം: നഗരസഭാ ഓഫിസിന് മുന്നിലെ പാർക്കിങ് സൗകര്യം നഷ്ടമായി

ഏലൂർ ∙ നഗരസഭ നടപ്പിലാക്കിയ സൗന്ദര്യവൽക്കരണം നഗരസഭാ ഓഫിസിനു മുന്നിലെ പാർക്കിങ് സൗകര്യം നഷ്ടമാക്കി. നഗരസഭാ ഓഫിസിൽ വിവിധ ആവശ്യങ്ങൾക്കെത്തുന്നവർ ഇരുചക്ര വാഹനങ്ങൾ പാർക്കു ചെയ്തിരുന്ന ഇടം നഷ്ടമാക്കി നഗരസൗന്ദര്യവൽകരണത്തിന്റെ ഭാഗമായി ടയറുകളിൽ പെയ്ന്റടിച്ചും മണ്ണുനിറച്ചും ചെടികൾ നട്ടുവച്ചിരിക്കുകയാണ്.

നഗരസഭാ ഓഫിസിന്റെ അങ്കണത്തിൽ ജീവനക്കാരുടെ വാഹനങ്ങൾ നിറഞ്ഞതിനാലും പൂച്ചട്ടികൾ സ്ഥാപിച്ചതിനാലും പുറമേ നിന്നു വിവിധ ആവശ്യങ്ങൾക്കു വരുന്നവർക്കു പാർക്ക് ചെയ്യാൻ ഇടമില്ല. വാഹനങ്ങൾ റോഡിൽ പാർക്കു ചെയ്ത ശേഷമാണ് ഓഫിസിൽ പ്രവേശിക്കുന്നത്. ഇത് അപകട‌ത്തിനും മറ്റു വാഹന ഡ്രൈവർമാരുടെ ശകാരം കേൾക്കുന്നതിനും ഇടയാക്കുന്നു.