റോ–റോ സേതു സാഗർ -1 മുടങ്ങി; റോ–റോ ഒന്നുമാത്രമായി: യാത്രാക്ലേശം രൂക്ഷം

എളങ്കുന്നപ്പുഴ ∙ റോ–റോ സേതു സാഗർ -1 വീണ്ടും മുടങ്ങി. കൺട്രോൾ സിസ്റ്റം തകരാറിലായതിനെ തുടർന്നാണിത്. ഇതോടെ സർവീസിൽ ഒരു റോറോ മാത്രമായത് യാത്രാക്ലേശമേറ്റുകയാണ്. വൈപ്പിനിലും ഫോർട്ട്‌ കൊച്ചിയിലും മണിക്കൂറുകൾ കാത്തുകിടന്നാണു വാഹനങ്ങൾ അക്കരെയിക്കരെയിറങ്ങിയത്. ഒട്ടേറെ വാഹനങ്ങൾ ഇരുഭാഗത്തു നിന്നും കിലോമീറ്റർ സഞ്ചരിച്ചു എറണാകുളം വഴി നിശ്ചിത കേന്ദ്രങ്ങളിലെത്തി. വൈകിട്ട് വലിയ തിരക്ക് അനുഭവപ്പെട്ടു. 2 റോ–റോ സുഗമമായി സർവീസ് നടത്തണമെങ്കിൽ 3-ാമത് ഒന്നു കൂടി വേണമെന്ന ദീർഘകാല ആവശ്യം പരിഗണിച്ചു 3-ാം റോറോ നിർമാണം കൊച്ചി ഷിപ്പ്‌യാർഡിനെ കോർപറേഷൻ ഏൽപിച്ചിരിക്കുകയാണ്. ഇതിന്റെ നിർമാണം സമയബന്ധിതമായി പൂർത്തിയാക്കുന്നതിന് അധികൃതർ നടപടി സ്വീകരിക്കണമെന്നു റോ–റോ പാസഞ്ചേഴ്സ് അസോസിയേഷൻ ജനറൽ കൺവീനർ ജോണി വൈപ്പിൻ ആവശ്യപ്പെട്ടു.