ഞാനൊരു കാട്ടാന, ഇതുവഴി പോയപ്പോ, ചുമ്മാ മുട്ടീതാ..; അടുക്കള വാതിലിൽ മുട്ടിയത് കള്ളനെന്നു കരുതി, പക്ഷേ...
Mail This Article
മൂന്നാർ ∙ പുലർച്ചെ അടുക്കള വാതിലിൽ മുട്ടിയത് കള്ളനെന്നു കരുതി ആളെ കയ്യോടെ പിടികൂടാൻ വടികളുമായെത്തിയ സംഘം കാട്ടാനയെ കണ്ടതോടെ തിരിഞ്ഞോടി. മൂന്നാർ കന്നിമല എസ്റ്റേറ്റ് ടോപ് ഡിവിഷനിൽ ഇന്നലെ പുലർച്ചെ മൂന്നിനായിരുന്നു സംഭവം. ഇവിടെ കന്നിയമ്മൻ ക്ഷേത്രത്തിനു സമീപം ലയത്തിൽ താമസിക്കുന്ന മാടസ്വാമിയുടെ വീടിന്റെ അടുക്കള വാതിലിൽ ആണ് ആരോ മുട്ടുന്നത് പോലെ ശബ്ദം കേട്ടത്. കള്ളനെന്ന് കരുതി മാടസ്വാമി 300 മീറ്റർ അകലെ താമസിക്കുന്ന ബന്ധുക്കളെ ഫോൺ വിളിച്ചറിയിച്ചു.
അവർ അയൽവാസികളായ 6 പേർക്കൊപ്പം ആയുധങ്ങളുമായി മാടസ്വാമിയുടെ വീട് വളഞ്ഞു. ഇതിനിടെ പിന്നിലൂടെ കള്ളനെ കയ്യോടെ പിടിക്കാൻ എത്തിയവരാണ് അടുക്കള ഭാഗത്ത് കള്ളനല്ല കാട്ടാനയാണെന്ന് കണ്ടത്. ഇതോടെ സംഘം ജീവനും കൊണ്ട് സ്ഥലം വിട്ടു. രാത്രി 10 മണിയോടെ എത്തിയ രണ്ട് ആനകൾ അടങ്ങിയ സംഘം കുട്ടി, മരിയസെൽവം എന്നിവരുടെ വീടിനോട് ചേർന്നുള്ള ഷെഡുകളും കന്നിയമ്മൻ ക്ഷേത്രത്തിന്റെ ഷെഡും തകർത്തു. പകലും തേയിലത്തോട്ടത്തിൽ മേഞ്ഞു നടന്നു.