രാത്രി ബസ് തടഞ്ഞുനിർത്തി ഒറ്റയാന്റെ പരാക്രമം: സൈഡിലെ ഒരു ചില്ല് കുത്തിത്തകർത്തു, ചവിട്ടുപടി കുത്തിവളച്ചു

മൂന്നാർ ∙ ദേശീയപാതയിൽ രാത്രി ബസ് തടഞ്ഞു നിർത്തിയ ഒറ്റയാൻ വശത്തെ ചില്ല് തകർക്കുകയും ചവിട്ടുപടി കുത്തിവളയ്ക്കുകയും ചെയ്തു. തമിഴ്നാട് ട്രാൻസ്പോർട്ട് കോർപറേഷന്റെ മൂന്നാർ - രാജപാളയം റൂട്ടിലോടുന്ന ബസിനു നേരെയായിരുന്നു പരാക്രമം.

മൂന്നാറിൽ നിന്നു രാജപാളയത്തേക്കു പോവുകയായിരുന്ന ബസ് രാത്രി 10.30ന് പെരിയകനാൽ ഭാഗത്ത് എത്തിയപ്പോഴാണ് വളവിൽ റോഡ് മധ്യത്തിൽ ഒറ്റയാന്റെ മുന്നിൽപെട്ടത്. ഉടൻ നിർത്തിയെങ്കിലും ബസിന് അടുത്തേക്കെത്തിയ ആന കൊമ്പുകൊണ്ട് സൈഡിലെ ഒരു ചില്ല് കുത്തിത്തകർത്തു. ചവിട്ടുപടി കുത്തിവളയ്ക്കുകയും ചെയ്തു. ബസ് മുന്നോട്ടെടുത്തതോടെയാണ് കൊമ്പൻ സൈഡിലേക്ക് മാറിയത്.