റോഡിൽനിന്ന് തെന്നി 500 അടി താഴ്ചയിലേക്ക് കാർ വീണു; യാത്രക്കാരൻ രക്ഷപ്പെട്ടു

മറയൂർ∙ മാട്ടുപ്പെട്ടിയിൽ നിന്ന് മറയൂരിലെ പോയ കാർ റോഡിൽ നിന്നു തെന്നി 500 അടി താഴ്ചയിലേക്കു പതിച്ചു. കാറിലുണ്ടായിരുന്ന മറയൂർ കോട്ടക്കുളം സ്വദേശി കാരിവേലിൽ ജോയിസ് ജേക്കബ്(38)  നിസ്സാര പരുക്കുകളോടെ രക്ഷപ്പെട്ടു. കെഡിഎച്ച്പി മാട്ടുപ്പെട്ടി തേയില ഫാക്ടറിയിലെ ഫാക്ടറി ഓഫിസറായ ജോയിസ് ഡ്യൂട്ടി കഴിഞ്ഞു മറയൂരിലേക്കു പോകുന്നതിനിടെയായാണ് അപകടം. ഒൻപതാം മൈൽ എസ് വളവ് തിരിയുന്നതിനിടെ മഴയത്ത് പിന്നിലെ ടയർ തെന്നിയാണ് അപകടം.

കാർ പൂർണമായും നശിച്ചെങ്കിലും എയർബാഗ് തുറന്നതിനാൽ ജോയിസ് അദ്ഭുതകരമായി രക്ഷപ്പെടുകയായിരുന്നു. വാഹനത്തിന്റെ വശത്തെ ഗ്ലാസ് അടിച്ചുപൊട്ടിച്ചു പുറത്തിറങ്ങി മുകളിലേക്കു കയറിച്ചെന്ന് സമീപവാസികളെ വിളിച്ചുകൂട്ടുകയായിരുന്നു. പിറകിൽ വന്ന വാഹനത്തിലെ യാത്രക്കാർ അറിയിച്ചതിനെത്തുടർന്ന് മൂന്നാറിലെ അഗ്നിശമന സേന സ്ഥലത്തെത്തിയിരുന്നു. വാഹനം താഴേക്ക് പതിക്കുന്ന ശബ്ദം കേട്ടു സമീപത്തെ അൻപതോളം തോട്ടം തൊഴിലാളികൾ ഉൾപ്പെടെയുള്ളവർ സ്ഥലത്തെത്തി. മറയൂർ എസ്ഐയും സംഘവും സ്ഥലത്തെത്തി.