വാഹനാപകടങ്ങൾ തടയാൻ ക്രാഷ് ബാരിയറിനു പകരം യൂക്കാലിക്കമ്പുകൾ!

മൂന്നാർ∙ വാഹനാപകടങ്ങൾ തടയാൻ സുരക്ഷാഭിത്തിക്കും ക്രാഷ്ബാരിയറിനും പകരം യൂക്കാലി കമ്പുകൾ കൊണ്ടുള്ള വേലി. ദിവസേന ടൂറിസ്റ്റുകളുടേതുൾപ്പെടെ ഒട്ടേറെ വാഹനങ്ങൾ കടന്നുപോകുന്ന മൂന്നാർ മാട്ടുപ്പെട്ടി റോഡിലാണ് ഈ കാഴ്ച. മാട്ടുപ്പെട്ടി ഹൈറേഞ്ച് സ്കൂളിന് സമീപത്തെ കൊടുംവളവിലാണ് റോഡിന് ഇരുവശവും കലുങ്കോ സംരക്ഷണ ഭിത്തികളോ ഇല്ലാത്തത്. റോഡിന് കുറുകെയുള്ള തോടിന് മുകൾഭാഗത്താണ് യൂക്കാലി കമ്പുകൾ കെട്ടി സുരക്ഷാകവചം തീർത്തിരിക്കുന്നത്. മഴക്കാലമായതിനാൽ താഴെ തോട്ടിൽ വെള്ളം കുത്തിയൊഴുകുന്നു. മുൻപ് പലതവണ വാഹനാപകടങ്ങൾ ഉണ്ടായിട്ടുള്ള പ്രദേശമാണിവിടം.