44 വർഷങ്ങൾക്കുശേഷം ഓർമകളുടെ സംഗമം
Mail This Article
രാജകുമാരി∙ 44 വർഷങ്ങൾക്ക് മക്കൾക്കും കൊച്ചുമക്കൾക്കുമൊപ്പം കഥകളും വിശേഷങ്ങളുമായി അവർ ഒത്തു ചേർന്നു. രാജകുമാരി ഗവ.ഹൈസ്കൂളിലെ 1978-79 ബാച്ച് എസ്എസ്എൽസി പഠിച്ച വിദ്യാർഥികളാണ് ‘ഒരുമിക്കാം ഒരിക്കൽ കൂടി’ എന്ന പേരിൽ പൂർവ വിദ്യാർഥി സംഗമം സംഘടിപ്പിച്ചത്.
പഠന ശേഷം ഒരിക്കൽ പോലും കണ്ടു കാണാത്തവരും ഇക്കൂട്ടത്തിലുണ്ടായിരുന്നു. കർഷകർ, പൊതുപ്രവർത്തകർ, സംരംഭകർ, സർക്കാർ ഉദ്യോഗസ്ഥർ, പ്രവാസികൾ എന്നിങ്ങനെ വിവിധ തലങ്ങളിൽ ജോലി ചെയ്യുന്നവരും വീട്ടമ്മമാരും ഉൾപ്പെടെ 86 പൂർവ വിദ്യാർഥികളും 5 അധ്യാപകരും പങ്കെടുത്തു.
തങ്ങൾ മുൻപ് പഠിച്ച ക്ലാസ് മുറികൾക്ക് പകരം ഹൈടെക് ക്ലാസ് മുറികളാണ് ഇപ്പോഴുള്ളതെന്ന് പൂർവ വിദ്യാർഥികൾ പറഞ്ഞു. എങ്കിലും ഒരു ക്ലാസ് മുറിയിൽ പഴയതു പോലെ ഇരുന്ന് പൂർവ അധ്യാപകരുടെ വാക്കുകൾ കേട്ട് വിശേഷങ്ങൾ പങ്കു വച്ചാണ് എല്ലാവരും മടങ്ങിയത്.