വരയാടുകളുടെ പ്രജനനകാലം ആരംഭിച്ചു; ഇരവികുളം ദേശീയോദ്യാനം 2 മാസത്തേക്ക് അടച്ചു

മൂന്നാർ ∙ വരയാടുകളുടെ പ്രജനനകാലം ആരംഭിച്ചതിനാൽ ഇരവികുളം ദേശീയോദ്യാനം 2 മാസത്തേക്ക് അടച്ചു. ഏപ്രിൽ ഒന്നിനു തുറക്കും. ഉദ്യാനം അടച്ചതോടെ രാജമലയിലേക്കുള്ള വിനോദസഞ്ചാരികളുടെ പ്രവേശനവും ഇന്നു മുതൽ 2 മാസത്തേക്കു നിരോധിച്ചു. ഈ സീസണിൽ ഇതുവരെ 15 വരയാടിൻകുഞ്ഞുങ്ങളാണു പിറന്നത്. ഉദ്യാനത്തിലെ കുമരിക്കല്ല്, മേസ്തിരിക്കെട്ട്, വരയാട്ടുമൊട്ട എന്നിവിടങ്ങളിലായി പതിനൊന്നും രാജമലയിൽ നാലും കുഞ്ഞുങ്ങളാണു പിറന്നത്.

പ്രജനനകാലം അവസാനിച്ച ശേഷം ഏപ്രിൽ പകുതിയോടെ വരയാടുകളുടെ കണക്കെടുപ്പു നടത്താനാണു വനം വകുപ്പ് ആലോചിക്കുന്നത്. കഴിഞ്ഞ ഏപ്രിലിൽ നടത്തിയ സർവേയിൽ ഇരവികുളം ഉൾപ്പെടെയുള്ള കേന്ദ്രങ്ങളിൽ 785 വരയാടുകളെ കണ്ടെത്തി. ഇതിൽ 125 എണ്ണം കുഞ്ഞുങ്ങളായിരുന്നു.