വാഹനം കൊമ്പുകൊണ്ടുയർത്തി ഓടയിലിട്ടു അരിക്കൊമ്പൻ; കലിപ്പടങ്ങാതെ തുമ്പിക്കൈകൊണ്ടു വലിച്ച് റോഡിലേക്കും

രാജകുമാരി ∙ കൊച്ചി-ധനുഷ്കോടി ദേശീയപാതയിൽ ആനയിറങ്കലിനു സമീപം ജീപ്പ് യാത്രികർക്കു നേരെ അരിക്കൊമ്പന്റെ ആക്രമണം. ശനിയാഴ്ച രാത്രി പത്തരയോടെയാണു മൂന്നാർ ഭാഗത്തേക്കു പോയ വാഹനത്തിനു നേരെ അരിക്കൊമ്പന്റെ ആക്രമണമുണ്ടായത്.

ഡ്രൈവർ ശിവകുമാർ അടക്കം 4 പേരാണു വാഹനത്തിലുണ്ടായിരുന്നത്. വണ്ടിയിലുണ്ടായിരുന്ന 2 പേർ റോഡിലേക്കിറങ്ങി ഓടിയപ്പോൾ അരിക്കൊമ്പൻ അവരുടെ പിന്നാലെ പാഞ്ഞു. ഇൗ സമയം ശിവകുമാറും സുഹൃത്ത് മദനനും ജീപ്പിൽ നിന്ന് ഇറങ്ങിയോടി. പിന്നീട് അരിക്കൊമ്പൻ തിരിച്ചെത്തി വാഹനം കൊമ്പുകൊണ്ടുയർത്തി ഓടയിലിട്ട ശേഷം തുമ്പിക്കൈകൊണ്ടു വലിച്ച് റോഡിലേക്കെടുത്തിട്ടു.