ഇടുക്കി – ചെറുതോണി അണക്കെട്ടുകളിലേക്ക് സന്ദർശക പ്രവാഹം

ചെറുതോണി ∙ പ്രവേശനത്തിനുള്ള കാലാവധി അവസാനിക്കാനിരിക്കെ, ഇടുക്കി – ചെറുതോണി അണക്കെട്ടുകളിലേക്ക് സന്ദർശക പ്രവാഹം. ഇന്നലെ മാത്രം മൂവായിരത്തിലേറെ സഞ്ചാരികളാണ്  കണ്ടു മടങ്ങിയത്. കഴിഞ്ഞ രണ്ടാഴ്ചയായി ദിവസവും ശരാശരി രണ്ടായിരത്തോളം സഞ്ചാരികൾ എത്തുന്നുണ്ടെന്ന് അധികൃതർ പറഞ്ഞു.

ചെറുതോണി അണക്കെട്ടിൽ വാർഷിക അറ്റകുറ്റപ്പണികൾ നടക്കുന്നതിനാൽ ഈ മാസം ആദ്യം മുതൽ ഇടുക്കി അണക്കെട്ടിന്റെ പ്രവേശന കവാടത്തിലൂടെയാണ് സഞ്ചാരികളെ അണക്കെട്ടിലേക്ക് പ്രവേശിപ്പിക്കുന്നത്. ക്രിസ്മസ് – ന്യൂ ഇയർ വാരാഘോഷത്തോടനുബന്ധിച്ച് കഴിഞ്ഞ വർഷം ഡിസംബറിൽ തുറന്ന അണക്കെട്ടുകൾ നാളെ അടയ്ക്കും. അതോടെ ശനി, ഞായർ ദിവസങ്ങളിലും അവധി ദിനങ്ങളിലും മാത്രമായിരിക്കും അണക്കെട്ടുകളിലേക്ക് സന്ദർശകരെ അനുവദിക്കുക.