ഉപ്പുതറ ∙ കാട്ടുപന്നിയുടെ ആക്രമണത്തിൽ ഗൃഹനാഥയ്ക്കു ഗുരുതര പരുക്ക്. തവാരണ പൂങ്കാവനം ചൊള്ളമാടി അയ്യപ്പന്(68) ആണ് പരുക്കേറ്റത്. ഇന്നലെ ഉച്ചയ്ക്ക് 12ന് വീട്ടുവളപ്പിലായിരുന്നു ആക്രമണം. വീട്ടിൽ നിന്നു പുറത്തേക്കിറങ്ങിയ വയോധികയെ സമീപത്തു നിന്നിരുന്ന കാട്ടുപന്നി ആക്രമിച്ചു. 

തേയിലക്കാട്ടിലേക്ക് വീണപ്പോൾ വീണ്ടും ആക്രമിച്ചു. വയറും കാലും കടിച്ചുകീറുകയായിരുന്നു. അവിടെ നിന്ന് രക്ഷപ്പെട്ട് അരക്കിലോമീറ്ററോളം സഞ്ചരിച്ച് റോഡിൽ എത്തിയാണ് നാട്ടുകാരെ വിവരം അറിയിച്ചത്. സാമൂഹികാരോഗ്യ കേന്ദ്രത്തിലെത്തിച്ച് പ്രാഥമിക ശുശ്രൂഷ നൽകിയശേഷം കോട്ടയം മെഡിക്കൽ കോളജ് ആശുപത്രിയിലേക്ക് മാറ്റി. പൂട്ടിക്കിടക്കുന്ന തോട്ടം മേഖലയായ ഇവിടെ ഒട്ടേറെ കാട്ടുപന്നികൾ ഉള്ളതിനാൽ ജനങ്ങൾ ഭീതിയിലാണ്. വനപാലകർ സ്ഥലം സന്ദർശിച്ചു.