കാട്ടാനശല്യം രൂക്ഷം; പ്രതിഷേധം ശക്തം

കട്ടപ്പന∙ കാഞ്ചിയാർ പഞ്ചായത്ത് പരിധിയിലെ കോവിൽമല പാമ്പാടിക്കുഴി, മറ്റപ്പള്ളിക്കവല തുടങ്ങിയ പ്രദേശങ്ങളിൽ കാട്ടാനയിറങ്ങുന്നത് ഭീതി പരത്തുന്നു. പാമ്പാടിക്കുഴിയിൽ എത്തിയ കാട്ടാനകൾ വ്യാപകമായി കൃഷി നശിപ്പിച്ചു. ചിലരുടെ വീടുകൾക്കു സമീപം വരെ കാട്ടാനകൾ എത്തി. പാമ്പാടിക്കുഴി കാലായിൽ രാജപ്പൻ, കണക്കൽ സണ്ണി, കിണറ്റുങ്കൽ തങ്കമ്മ, ഈന്തനാൽ ജോർജ് എന്നിവരുടെ കൃഷിയിടങ്ങളിലാണ് ആന നാശം വിതച്ചത്.  പടക്കം പൊട്ടിച്ചും ബഹളമുണ്ടാക്കിയുമാണ് ആനകളെ തുരത്തുന്നത്. ആനകൾ എത്തിയ വിവരമറിഞ്ഞ് വനപാലകർ സ്ഥലത്തെത്തി പരിശോധന നടത്തിയിരുന്നു. എന്നാൽ ആനകൾ കൃഷിയിടങ്ങളിലേക്ക് എത്തുന്നത് തടയാൻ നടപടിയുണ്ടാകുന്നില്ലെന്നാണ് നാട്ടുകാരുടെ പരാതി.