പോതമേട്ടിലെ മാലിന്യപ്രശ്നം: പരിഹാരം ഇനി വീടുകളിൽ തന്നെ

മൂന്നാർ ∙ പള്ളിവാസൽ പഞ്ചായത്തിൽപെട്ട പോതമേട് നിവാസികൾക്ക് പഞ്ചായത്ത് മാലിന്യ സംസ്കരണ യൂണിറ്റുകൾ വിതരണം ചെയ്തു. പോതമേട്ടിലെ 130 കുടുംബങ്ങൾക്കാണ് വീടുകളിൽ തന്നെ ജൈവ മാലിന്യങ്ങൾ സംസ്കരിക്കുന്നതിനുള്ള ബയോ കംപോസ്റ്റ് യൂണിറ്റായ ജി – ബിൻ വിതരണം ചെയ്തത്. 4300 രൂപയാണ് ഓരോ യൂണിറ്റിന്റെയും വില. ഇതിന്റെ 10 % ഓരോ കുടുംബവും നൽകണം. ബാക്കി തുക പഞ്ചായത്താണ് ചെലവഴിച്ചത്. 

വീടുകളിലെ ജൈവ, അജൈവ മാലിന്യങ്ങൾ സംസ്കരിക്കാൻ സൗകര്യമില്ലാത്തതിനാൽ പോതമേട് നിവാസികൾ ഇവ ടൗണിൽ കൊണ്ടുവന്ന് തള്ളുന്നത് പതിവായിരുന്നു. പോതമേട് ടൗണിൽ മാലിന്യങ്ങൾ കുന്നുകൂടി കിടക്കുന്നതു സംബന്ധിച്ച് പരാതികൾ വ്യാപകമായതോടെയാണ് വീടുകളിൽ തന്നെ ഇവ സംസ്കരിക്കുന്നതിനുള്ള സംവിധാനം പഞ്ചായത്ത് ഒരുക്കിയത്. പഞ്ചായത്ത് പ്രസിഡന്റ് വി.ജി.പ്രതീഷ് കുമാർ യൂണിറ്റുകളുടെ വിതരണോദ്ഘാടനം നിർവഹിച്ചു. പഞ്ചായത്തംഗങ്ങളായ കണ്ണൻ, എഫ്.രാജാ എന്നിവർ പ്രസംഗിച്ചു.