എന്നാ പിന്നെ മൂന്നാറിന് വിട്ടാലോ? വേനൽ കത്തുമ്പോഴും മൂന്നാർ ‘കൂൾ’; മാർച്ച് പകുതിയായിട്ടും അതിശൈത്യം

മൂന്നാർ ∙ നാട്ടിലെങ്ങും കനത്ത ചൂട് തുടരുമ്പോഴും മൂന്നാറിൽ അതിശൈത്യം തുടരുന്നു. മൂന്നാറിനു സമീപമുള്ള ചെണ്ടുവരയിൽ തിങ്കളാഴ്ച രാവിലെ രണ്ട് ഡിഗ്രിയായിരുന്നു താപനില രേഖപ്പെടുത്തിയത്. മൂന്നാർ ടൗൺ, നല്ലതണ്ണി എന്നിവിടങ്ങളിൽ 3, ദേവികുളം, ലക്ഷ്മി, സെവൻമല എന്നിവിടങ്ങളിൽ 4, സൈലന്റ്‌വാലിയിൽ 5 ഡിഗ്രി സെൽഷ്യസായിരുന്നു രാവിലെ രേഖപ്പെടുത്തിയ താപനില.

കഴിഞ്ഞ ഏതാനും ആഴ്ചകളായി മൂന്നാറിൽ രാത്രിയും പുലർച്ചെയും നല്ല തണുപ്പാണ് അനുഭവപ്പെടുന്നത്. ഫെബ്രുവരി ആദ്യവാരം മൂന്നാറിൽ താപനില മൈനസ് മൂന്ന് വരെ താഴ്ന്നിരുന്നു. വർഷങ്ങൾക്കു ശേഷമാണ് മാർച്ച് പകുതിയായിട്ടും മൂന്നാറിൽ തണുപ്പ് തുടരുന്നത്. രാത്രിയിലും പുലർച്ചെയും തണുപ്പ് ശക്തമാണെങ്കിലും പകൽ ശക്തമായ ചൂടാണ് അനുഭവപ്പെടുന്നത്. 20 – 23 ഡിഗ്രി സെൽഷ്യസാണ് പകലത്തെ ചൂട്.