വേനൽ കടുക്കുന്നു; ആശങ്കയിൽ ഏലം കർഷകർ

നെടുങ്കണ്ടം ∙ വേനൽ കടുക്കുന്നു; ആശങ്കയിൽ ഏലം കർഷകർ. കഴിഞ്ഞ വേനൽ കെടുതികളിൽ നിന്ന് മുക്തമാകും മുൻപേ ഇത്തവണത്തെ വേനലും ആശങ്കയുണർത്തുന്നു. ചില ഭാഗങ്ങളിൽ നേരിയ വേനൽ മഴ ലഭിച്ചെങ്കിലും ഏലം മേഖലയിൽ ആശ്വാസത്തിനു വകയില്ല. കൃത്യമായി ജലസേചനം നടത്തിയിട്ടും കൂടിവരുന്ന ചൂടിൽ ഏലം വാടിത്തുടങ്ങി. ഇതോടെ ഉൽപാദനവും ഗണ്യമായി കുറഞ്ഞിട്ടുണ്ട്.

ഉയർന്ന പരിപാലന ചെലവിന് പുറമേ തണൽ വലകൾ വാങ്ങുന്നതിനും അവ ഏലത്തോട്ടങ്ങളിൽ ഉയർത്തി കെട്ടുന്നതിനും കൂടുതൽ പണം ചെലവഴിക്കേണ്ടി വരുന്നത് കർഷകരെ പ്രതിസന്ധിയിലാക്കുകയാണ്. കഴിഞ്ഞ വേനലിൽ കരിഞ്ഞുണങ്ങിയ ഏലച്ചെടികളിൽ ബാക്കിയായവയും പുനരുദ്ധാരണ കൃഷി ചെയ്തവയുമാണ് ഇത്തവണത്തെ വേനലിൽ കൂടുതലായി ഭീഷണി നേരിടുന്നത്. എന്നാൽ, കഴിഞ്ഞ വേനൽ കെടുതിയെ തുടർന്ന് സർക്കാർ പ്രഖ്യാപിച്ച നഷ്ട പരിഹാരത്തുക ഇതുവരെയും കർഷകർക്ക് പൂർണമായും ലഭ്യമായിട്ടില്ല.