അറക്കുളം ഉപജില്ലാ വിദ്യാഭ്യാസ ഓഫിസ്: പഴക്കം 2 വർഷം മാത്രം; സീലിങ് തകർന്നുവീണു

മൂലമറ്റം∙ അറക്കുളം ഉപജില്ലാ വിദ്യാഭ്യാസ ഓഫിസിന്റെ സീലിങ് തകർന്നുവീണു. ആർക്കും പരുക്കില്ല. ഇന്നലെ ഉച്ചയ്ക്ക് 2 മണിയോടെയാണ് കെട്ടിടത്തിലെ ഒരുഭാഗത്തെ സീലിങ് തകർന്നുവീണത്. അപകടം നടക്കുമ്പോൾ പത്തിലേറെ ജീവനക്കാർ ഓഫിസിലുണ്ടായിരുന്നു. ഇവർ പുറത്തേക്കു ചാടി രക്ഷപ്പെടുകയായിരുന്നു. 2 വർഷം മുൻപ് പൊതുമരാമത്ത് വകുപ്പാണ് ഇവിടെ സീലിങ് സ്ഥാപിച്ചത്. നിർമാണത്തിലെ അപാകതയാണ് അപകടത്തിന് കാരണമെന്നാണ് സൂചന. ഫയലുകളും മറ്റു രേഖകളും നഷ്ടപ്പെട്ടിട്ടില്ലെന്ന് എഇഒ ആഷിമോൾ കുര്യാച്ചൻ പറഞ്ഞു. മൂലമറ്റം അഗ്നിശമന സേനാ ഉദ്യോഗസ്ഥർ രക്ഷാപ്രവർത്തനത്തിന് നേതൃത്വം നൽകി. ഓഫിസ് തൽക്കാലത്തേക്ക് സമീപത്തെ ശ്രീചിത്തിര സ്‌കൂളിലെ മുറിയിലേക്ക് മാറ്റും.