അൺലോക്ക് ഗതാഗതം; കണ്ണൂർ വഴി 6 ട്രെയിനുകൾ യാത്ര പുനരാരംഭിച്ചു

കണ്ണൂർ ∙ റെയിൽവേ സ്റ്റേഷൻ വഴി കടന്നുപോകുന്ന ആറു ട്രെയിനുകളുടെ കൂടി യാത്ര പുനരാരംഭിച്ചു. കണ്ണൂർ – ആലപ്പുഴ എക്സിക്യൂട്ടീവ് എക്സ്പ്രസ്, കോയമ്പത്തൂർ പാസഞ്ചർ, കണ്ണൂർ –എറണാകുളം ഇന്റർസിറ്റി എക്സ്പ്രസ് എന്നിവ ഇന്നലെ സർവീസ് തുടങ്ങി. തിരുവനന്തപുരം – കണ്ണൂർ ജനശതാബ്ദി എക്സ്പ്രസ് ഇന്നലെ രാത്രി കണ്ണൂരിലെത്തി. ‌ഇന്നു പതിവുപോലെ സർവീസ് നടത്തും. തിരുവനന്തപുരം – മംഗളൂരു (06347/48) എക്സ്പ്രസ് ഇന്നു രാവിലെ കണ്ണൂർ വഴി കടന്നുപോകും. നാഗർകോവിൽ – മംഗളൂരു ഏറനാട് എക്സ്പ്രസും ഇന്നു സർവീസ് പുനരാരംഭിക്കും. സമയക്രമത്തിൽ മാറ്റമില്ല. 

കൊങ്കൺ വഴി കടന്നുപോകുന്ന ട്രെയിനുകൾ മൺസൂൺ സമയക്രമം പാലിച്ചായിരിക്കും ഓടുന്നത്.കണ്ണൂർ വഴി കടന്നുപോകുന്ന പ്രധാന ട്രെയിനുകളിൽ മംഗളൂരു–തിരുവനന്തപുരം – മലബാർ എക്സ്പ്രസ്, പാലക്കാട് വഴിയുള്ള കണ്ണൂർ–യശ്വന്ത്പുര എക്സ്പ്രസ് എന്നീ ട്രെയിനുകൾ യാത്ര പുനരാരംഭിച്ചിട്ടില്ല. എല്ലാ ട്രെയിനുകളിലും റിസർവേഷൻ നിർബന്ധമാണ്.