പരീക്ഷാ ഹാളിൽ വിദ്യാർഥിനിയെ ബ്ലേഡ് ഉപയോഗിച്ചു പരുക്കേൽപ്പിച്ചു
Mail This Article
തലശ്ശേരി ∙ പരീക്ഷാ ഹാളിൽ വിദ്യാർഥിനിയെ ബ്ലേഡ് ഉപയോഗിച്ചു മറ്റൊരു വിദ്യാർഥിനി പരുക്കേൽപ്പിച്ചു. പ്ലസ്ടുവിൽ പഠിക്കുന്ന വിദ്യാർഥിനിയെയാണ് സഹപാഠി മുളകുപൊടി എറിഞ്ഞതിനു ശേഷം കഴുത്തിലും കൈയ്യിലും ബ്ലേഡ് കൊണ്ടു മുറിവേൽപ്പിച്ചത്. ഇന്നലെ രാവിലെ 10.30നാണു സംഭവം. ഒരേ ക്ലാസിൽ പഠിക്കുന്നവരാണ് ഇരുവരും. പ്ലസ്വൺ പരീക്ഷ എഴുതുകയായിരുന്നു. പൊടുന്നനെയാണ് വിദ്യാർഥിനിയുടെ മുടിക്കുത്തിൽ പിടിച്ചു കഴുത്തിലും കൈത്തണ്ടയിലും മുറിവേൽപ്പിച്ചത്.
പരീക്ഷാ ഡ്യൂട്ടിയിലുണ്ടായിരുന്ന അധ്യാപിക തടയാൻ ശ്രമിച്ചു. ഒച്ച കേട്ട് പ്രിൻസിപ്പലും സഹാധ്യാപകരും എത്തി പരുക്കേറ്റ വിദ്യാർഥിനിയെ ജനറൽ ആശുപത്രിയിൽ എത്തിച്ചു. പരുക്കേൽപ്പിച്ച പെൺകുട്ടിയെ പിടിച്ചുമാറ്റി. കുട്ടി അസ്വാഭാവികമായി പെരുമാറിയതിനെത്തുടർന്ന് കോഴിക്കോട് ആശുപത്രിയിൽ പ്രവേശിപ്പിച്ചു. സ്കൂളിൽ നിന്നു വിവരം നൽകിയതിനെത്തുടർന്ന് പൊലീസ് സ്ഥലത്ത് എത്തി. സംഭവത്തിൽ പൊലീസ് കേസ് എടുത്തു.