ലൈനിൽ മരം വീഴുമെന്നായപ്പോൾ അവധിയിലായിട്ടും മരത്തിൽ കയറി മുറിച്ചുനീക്കി സബ് എൻജിനിയർ

ശ്രീകണ്ഠപുരം ∙ ലൈനിൽ മരം പൊട്ടി വീഴുമെന്നായപ്പോൾ അവധിയിലായിട്ടും മരത്തിൽ കയറി അത്രയും ഭാഗം മുറിച്ചു നീക്കി സബ് എൻജിനിയർ. ശ്രീകണ്ഠപുരം കെഎസ്ഇബിയിലെ സബ് എൻജിനയർ കെ.വി.ഹരീഷാണ് മാതൃക കാട്ടിയത്. ചെങ്ങളായി കുണ്ടംകൈ റോഡിലെ വൈദ്യുതി ലൈനിലേക്കാണ് ഉണങ്ങിയ വലിയ മരം വീഴാറായതു പ്രദേശവാസികളുടെ ശ്രദ്ധയിൽപ്പെട്ടത്. മുള്ള് നിറഞ്ഞ മരം കൂടിയായതിനാൽ ഇതു മുറിച്ചു മാറ്റുക ഏറെ അപകടം നിറഞ്ഞ പണിയാണെന്നു മനസ്സിലായി.

മരം പൊട്ടി വീണാൽ ലൈനും വൈദ്യുതി തൂണും ഉൾപ്പെടെ പൊട്ടി നിലം പതിക്കും. ഒട്ടേറെ കുട്ടികളും വാഹനങ്ങളും കടന്നുപോകുന്ന റോഡാണിത്. വിവരം അറിഞ്ഞതോടെ സബ് എൻജിനീയർ ഹരീഷ് സ്ഥലത്തെത്തി. ഓഫിസിൽ വിവരമറിയിച്ചെങ്കിലും ജീവനക്കാർ കുറവാണെന്ന കാര്യം മനസിലായതോടെ കയറും മറ്റ് സാമഗ്രികളും എത്തിക്കണം എന്നറിയിച്ചു.

മറ്റൊരു സബ് എൻജിനീയർ ക്ലോഡിൻ സജിയും ഡ്രൈവർ സിനുവും വണ്ടിയുമായി സ്ഥലത്തെത്തി. ഇതോടെ മറ്റൊന്നും നോക്കാതെ ഹരീഷ് സമീപത്തെ വലിയ തേക്ക്മരത്തിൽ കയറുകയായിരുന്നു. പിന്നീട് കുണ്ടംകൈ ജ്വാല സ്വയം സഹായ സംഘം പ്രവർത്തകരുടെ സഹായത്തോടെ അപകടാവസ്ഥയിലായ മരം വലിച്ചു കെട്ടിയ ശേഷം മുറിച്ചു മാറ്റി.